Kontroll: Tre bruksforbod, eitt av dei til køyretøy med fiskelast
– Avrenning frå fisketransport kan forårsaka glatte og sleipe vegar, og kan vera til fare for miljøet.
På dagtid i går, torsdag 5. desember, kontrollerte Statens vegvesen tunge køyretøy ved Svegatjørn kontrollplass.
57 tunge køyretøy blei kontrollert.
– Alle som ferdes på norske veger skal komma trygt frem, seier Inge Hellebust i Statens vegvesen.
Gjennom å holda igjen tunge og lette kjøretøy med feil og manglar, blir vegane tryggare.
Tre køyretøy fekk mangelseddel for tekniske manglar.
Ein rapport blei sendt til arbeidstilsynet, ved oppdaging av ei kran med utgått godkjenning.
Ein førar fekk advarsel for mindre brot på køyre- og kviletidsbestemmingane.
For tre av sjåførane førte forholda til bruksforbod.
Lastesikring, PKK og avrenning
Eitt av køyretøya som blei kontrollert fekk bruksforbud for avrenning frå fiskelast.
– Avrenning frå fisketransport kan forårsaka glatte og sleipe vegar, og kan vera til fare for miljøet, seier Hellebust.
Også to andre sjåførar fekk bruksforbod. Den eine grunna utilstrekkeleg sikring av last.
Det siste bruksforbodet skuldast at det ikkje var gjennomført periodisk køyretøykontroll (PKK). Dette regelbrotet resulterte i avskilting.
