Handball | 13. apr. 2022

Korleis førebu seg til debut på øvste nivå?

Ein delegasjon unge fagpersonar fekk med seg Fredrik og Jørgen si dømming i Rema 1000-ligaen.

F.v.: Fredrik Andresen og Jørgen Wold i garderoben med unge kollegaer frå Os handball. (Foto: Privat/Thor Finn Elverhøi)
Kjetil Vasby Bruarøy
Kjetil Vasby Bruarøyonsdag 13. apr. 2022 13:05

I slutten på mars blei det klart at dommarduoen Jørgen Wold og Fredrik Andresen frå Os Turn Handball skulle få dømma sin første herrekamp i Rema 1000-serien.

Dei er no i sin andre sesong i Rema 1000-ligaen kvinner, ved sidan av 1. divisjon menn.

Laurdag 9. april sto serieavsluttinga Bergen-Nerbø for tur.

Kampen enda 32-32. Bergen landa på 13. plass av 14 lag og rykker ned, Nerbø landa på 5. plass.

Fekk gode tilbakemeldingar

Det blei delt ut tre 2-minuttarar og tre 7-meterskast i den jamne kampen.

– Det kunne kanskje vore delt ut fleire, men det var der vi la lista, seier Fredrik Andresen etter kamp.

Han fortel at både gruppeleiar og observatør gav gode tilbakemeldingar etter kamp. Fredrik og Jørgen synest også at det gjekk greit.

Fredrik og Jørgen fekk også eit oppdrag heime i Oshallen i vinter. (Foto: Kjetil Vasby Bruarøy)

– Kva er den største forskjellen på å dømma herrar og damer i Rema 1000-ligaen, for dykk som har erfaring med damene frå før?

– Det er ikkje berre fysikken som er forskjell, også spelestilen legg opp til fleire fysiske duellar. Der damene oftare prøver å spela seg til ei luke, går herrane meir 1 mot 1.

– Det skal også gjerne meir til for at dei ventar at vi bles, men når dei første ventar det, så smeller det skikkeleg, seier Fredrik.

Serien er over, men det gjenstår playoff i kamp om opp- og nedrykk, og det er sjanse for at Fredrik og Jørgen får meir å henga fingrane i før sommaren.

Til Bergen for å læra

Mens toppdommarane frå Os fekk sin lærdom, var fleire av den etterkvart så store dommargruppa til Os Handball i Framohallen for å læra.

– Jørgen og Fredrik er historiske som første dommarpar frå Os i ei rolle som dette. Det er naturleg for oss å sjå på, bli inspirert av og bruka denne sjansen til læring, seier dommaransvarleg Thor Finn Elverhøi.

Ti unge dommarar frå Os var heime og ledige denne laurdagskvelden, og blei med til kamp. Før kampstart fekk dei dessutan eit lærerikt møte med toppdommarane.

Som ein bonus fekk ungdomane også møta landslagsspelar Camilla Herrem i hallen. (Foto: Privat)

– Eg spurde dommarane korleis dei førebur seg til ein kamp som dette, og dei fortalte grundig, i 10-12 minutt, kva samtalar og diskusjonar dei har før start.

Fredrik synest det er flott gjort å ta ungdomane med på kamp for å observera lokale dommarar.

– Om nokre av dei har blitt inspirert til å ta dømminga vidare, er det stas. Om det har vore til hjelp på nivået dei dømmer i dag, er det også kjekt.

– Det er berre fem år sidan eg sjølv starta, og det har blitt ein stadig meir spennande jobb.

Elverhøi var speaker på kampen, dei unge dommarane sat på tribunen.

– Eg reknar med at dei gjorde sine observasjonar, og hadde sine diskusjonar. I tillegg skal vi ha ein prat over påske om denne kampen, fortel den lokale, engasjerte dommarsjefen.

Han synest også at duoen klarte seg bra.

– Dei presterte veldig greit, og eg reknar med at dei får fleire oppdrag på dette nivået.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.