Kristoffer - ein rollemodell

For nesten to år sidan starta Kjør for Livet opp på Os i samarbeid med Os MX og MC klubb.

Ein av dei første deltakarane i prosjektet var ungguten Kristoffer Hjertholm frå Nore Neset.

Les òg: – Har gjort noko med meg

Denne sesongen har Kristoffer ikkje vore ein av deltakarane, men i staden vore med som støtte og mentor for dei nye deltakerane saman med leiarteamet Kalle Pedersen og Jane Espeland.

Rørt til tårar

Teamsjef Espeland fekk måndag æra av å overreka prisen som «Årets Rollemodell» til Kristoffer.

– Prisen fekk du då alle teamleiarane frå heile landet var samla på Røros tidlegare i vinter, men vi har klart å halde det hemmeleg for deg fram til i dag.

– Eg må innrømma at det rant ein tåre både hos meg og Kalle då vi fekk høyra om kåringa.

– Det at du og dei andre deltakarane i Kjør for Livet lykkast er den største gleda vi kan få, smilte Espeland.

Kristoffer Hjertholm er den første ungdomen som har fått prisen.

– Visste ikkje om du hadde tid

I grunngjevinga for pristildelinga trakk Espeland fram den positiviteten Kristoffer viser overfor dei andre deltakarane og dei vaksne i prosjektet.

– Du viser respekt for oss andre, for Kjør for Livet sine verdier og for motorsyklane. Du er ein framifrå representant.

– Då vi spørte deg i fjor haust om du ville vera med og hjelpe til visste du ikkje. Det var ikkje sikkert du hadde tid, men den første som stilte då vi starta opp att var du.

– Du stiller presis og er ikkje redd for å ta i eit tak, roste teamsjefen.

– Det å vera jamngammel med dei andre deltakarane og skulle vera ein leiar er ikkje berre lett, men også den oppgåva har du løyst.

– Til og med meg og Jane strammar du opp om det trengs, supplerte Kalle Pedersen før Kristoffer fekk det synlege beviset på at han er Kjør for Livet sin rollemodell.