midtsiden

Kritisk til Os legevakt

Svineinfluensa ser ut til å ha kome til Os, men pasientane er ikkje nøgd med handsaminga dei fekk hos den lokale legevakta.

Av: Kjetil Vasby Bruarøy

Laurdag kom 12 kameratar i 20-årsalderen heim frå Syden-tur. Ein av dei var på sjukehus på reisemålet, den greske øya Ios, grunna symptom på svineinfluensa. På flyet heim fekk fleire av osingane feber, hoste og diaré.

- Vi foreldre kjørte to av gutane til Os legevakt, medan dei andre ville venta heime for å sjå kva legen gjorde med dei som blei undersøk, fortel far til den eine av gutane.

Men på Os legevakt såg dei ikkje ut til å vera førebudd på å ta imot denne type pasientar.

Venting og registrering
Det første som skjedde på legevakta var at legen brukte ein time på å leita etter ein lapp med vegleiing til bruk av pc og journalprogram.

- Til slutt måtte eg berre gripa inn og hjelpa til, mykje sa seg jo sjølv på den maskina. Då programmet endeleg kom på, tok det lang tid med registrering, i mellomtida kom pasientar med andre skadar.

- Eg skjønte at dette kom til å ta tid, så eg sa at ei mor som kom med ein son med kutt i fingeren kunne gå før oss.

Ny leiterunde
Mora til 5-åringen kontakta midtsiden sundag, etter det å opplevde som ein frustrerande kveld på legevakten.

- Guten vår hadde kutta seg og måtte sy, men legen fann ikkje utstyr til å vaska såret med. Ho spurte om vi ville gå ut medan ho leita. Men vi ville verken gå frå guten vår eller sitja på eit lite venterom saman med folk som truleg har svineinfluensa, seier mora.

Etter nesten ein time med leiting fann legen utstyret, men då ho sette seg ned med den unge pasienten ombestemte ho seg, og ba foreldra reisa til legevakta i Bergen for å sy.

- Vi var sinte og skuffa, det burde vore unødvendig å ta hand om ein gut på 5 år på denne mpten. Eit kvarter etter at vi kom til Bergen var heldigvis fingeren til sonen vår sydd.

Manglande apparat?
Gutane med influensa var til saman fire timar på legevakta. Til slutt fekk dei tatt testen som viste at dei var infisert av virus, slik at gutane fekk tamiflu og kunne reisa heim.

- Det kom fleire andre på legevakta medan vi venta, nokre av dei reiste igjen. Legen som var på vakt var tydeleg stressa, blant anna stakk ho seg sjølv då ho skulle ta blodprøve av sonen min.

- Men eg klandrar ikkje legen, eg synes synd på ho, for det ser ut som om Os kommune ikkje har gode nok rutinar på orden og opplæring i det å vera legevakt, seier faren.

- Samstundes burde ikkje ein pc hindra ein lege i å gje hjelp, kva om det var straumbrot? Vi må likevel ta oss av dei som er sjuke, meiner han.

Er det svineinfluensa?
Det er førebels ikkje sikkert at det er svineinfluensa gutane har, men faren til ein av dei sjuke gutane seier at legane no ikkje bruker tid på testing av kva type influensa dei har.

- Slik eg har forstått det er det over 90 prosent sjanse for at det er svineinfluensa du har, om du får influensa i desse dagar. Derfor konsentrerer helsevesenet seg no om å starta behandlinga raskt, og det skal vera stor fordel å få tamiflu første dag.

- Korleis har guten din det no?

- Han er heime i senga si, og han har fått huset for seg sjølv. Veslebroren har flytta til ein nabo medan eg og kona prøver å gje han fred.

Medan smittevernlege i Os, Jan Rune Stangeland, er på ferie, er det Vegard Hodneland som har denne rolla. Midtsiden.no lukkast ikkje i å nå Hodneland på telefon sundag.

Har du spørsmål om svineinfluensa?
Les om svineinfluensa på vg.no og om behandling med tamiflu på db.no.

Fleire saker