Kva med båtfolket?

Då hyttekontaineren på Bruarøy fekk lås hopa det seg opp med frittflytande boss. Kven sitt ansvar er det å ta imot avfall frå båtturistar?

Kjetil Vasby Bruarøytirsdag 13. juli 2010 12:09

For nokre år sidan blei kontaineren for restavfall frå hytteeigarar flytta frå Vedholmen Landhandel til snuplassen på Bruarøy, knappe hundre meter frå kaien.

Butikken fekk eigen kontainer med lås og problemet med plassering av søppel, gamle sofaer og påhengsmotorar bak butikken var over.

Men nyleg fekk hyttekontaineren, som fleire andre tilsvarande kontainarar i Os, lås. Då hopa det seg opp igjen.

- Nokre set bosset bak kontaineren på snuplassen, andre er meir kreative, og set søppelet i skuret vårt eller på vaskerommet vi har for gjestar som kjem sjøvegen, fortel butikkeigar Inglaug Brimsholm.

Avgift året rundt
No lurer ho på kven sitt ansvar det er å ta imot boss frå båtfolk.

- Dei betalar jo avgift på henting heime, også når dei er i båt. Ein skulle tru at BiR eller Os kommune kunne sett ut nokre kontainarar for båtfolk.

Os har éin båt-kontainer
Konstituert kommunikasjonssjef hos BiR, Mette Nygård Havre, fortel at Os har gått frå versting til ganske bra når det gjeld hytteavfall.

- Etter at vi sette lås på ei rekkje kontainarar kom det seg veldig, seier ho til Midtsiden.no.

- Men for båtfolk er det berre éin kontainer i Os. Os kommune spanderer på båtfolk og campingturistar, og kontaineren er plassert ved Esso-stasjonen ved gjestebrygga i Os sentrum.

- Vanleg hamneservice
På spørsmål om kven sitt ansvar det er å ta hand om avfall frå båtturistar, og kva som er normal praksis, svarar Havre:

- Dei som tilbyr kaiplass, vatn, toalett og gjerne bruk vaskemaskin plar også å ha renovasjon. Mottak av restavfall frå båt plar vera inkludert i hamneavgifta, men kan også krevjast inn som ei tilleggsavgift.

- Men båtfolket betaler jo avgift heime, også når dei er i båten. Kunne dei ikkje fått dette som ein service frå BiR?

- Nei. Folk kjem med båt frå mange kommunar, ikkje berre dei som er kunde hos BiR. Dessutan betaler dei for eksempel NRK-lisens heile året også, sjølv om dei av og til er i båt eller i Syden.

Fleire syndarar
AVfallet som står ved kontainarar og andre plassar stammar ikkje berre frå båtfolk.

Vitne fortel om både fastbuande som brukte hyttekontainaren før det kom lås på, og om bilar som kjem over brua frå Os for å setja frå seg ein sekk.

Når lås kjem på blir det ofte ein overgangsperiode før slike syndarar finn andre plassar å kasta det dei ikkje får plass til i spannet heime.

For båtfolk ser det ut som om det er dei som driv hamnene i Os som må finna ei løysing.