Kven vinn denne?

Til saman 200 privatpersonar og bedrifter har same sjanse til å vinna M��land-skulpturen "Dansar". I går blei det bestemt kor tid det skal vera trekning.

Kjetil Vasby Bruarøyfredag 13. nov. 2009 08:23

Rett over 6.950.000 kroner har kome inn som støtte til Oseana som følgje av OKK-kampanjen. Frå juni 2008 og fram til no har privatpersonar og bedrifter gjeve pengestøtte til prosjektet ved å kjøpa andel eller stolsete.

Liten eller stor sum, alle 200 har kvart sitt lodd i trekninga av skulpturen.

- I sommar bestemte vi oss for å ta trekninga av vinnaren samstundes med nedlegging av grunnstein, og i møte i byggekomiteen torsdag blei det endeleg stadfesta at dette kjem til å skje laurdag 5. desember, seier ordførar Terje Søviknes.

Seremonien startar klokka 12 og er open for alle. Det blir samstundes ope for synfaring på byggeplass og molo.

Verdi: 30.000 kroner
Kunstnar Arne Mæland har laga skulpturen som kanskje har vore ei gulrot for enkelte gåvegjevarar.

Bronseskulpturen, som har 24 karat bladgull på kjolen, heiter "Dansar", og ville ha kosta rundt 30.000 kroner om du skulle kjøpt den i Solbakkestova.

Mæland var inspirert av Anitra, jenta som dansa rundt Peer Gynt, men som han ikkje kunne få, då han lagde ein moderne versjon av dansaren.

- Med all den scenekunsten som vi skal få oppleva i kunst- og kultursenteret trur eg denne passar fint som premie, sa Arne Mæland til Midtsiden.no første gong skulpturen blei vist, i mai i år.

Grunnstein med skrin
Grunnsteinen blir lagt ned der trappa frå foajeen kjem ned til kunstgalleriet.

- Laurdag 5. desember er det grunnsteinen som blir lagt ned. Seinare kjem ein synleg plankett som skal ligga oppå, fortel Søviknes.

I grunnsteinen skal det også ligga eit skrin med informasjon. Om samfunnet og bygningen ein gong i framtida rasar saman skal folk kunna finna skrinet med informasjon om prosjektet, og om Os i den tida det blei bygd.

- Vi held no på å bestemma kva vi skal legga i skrinet, seier ordføraren med eit smil.

6 på 100.000 eller meir
Som vi skreiv i går har det vore fleire svært rause gåvegjevarar utanom dei første, Per Grieg sr, den anonyme personen bak 10 millionar kroner og Kulturvenner av Os med sine 4,7 millionar kroner.

Men også andre har gjeve større beløp:
1 bedrift og 2 privatpersonar har gjeve kvar sine 250.000 kroner.
1 bedrift har gjeve 200.000 kroner
1 bedrift og 1 privatperson har gjeve 100.000 kroner
I tillegg har bedrifter kome med både 40, 50, og 60.000 kroner i støtte.

Os kommune har likevel ikkje fått inn så mykje som dei hadde håpa på, knappe 7 millionar kroner av budsjetterte 10 millionar har kome inn.

Men privatpersonar og bedrifter er som kjent ikkje dei som i hovudsak har svikta, Os hadde håpa på 38 millionar frå staten, men har fått null. No jobbar dei med ny strategi, den kan du lesa meir om i lenkjene under.