Politiet var raskt på plass då brannalarmen gjekk. No er ein osing i 20-åra dømd til å betala erstatning på nær 800.000 kroner (Arkivfoto: Andris Hamre)

Må betala 800.000 i erstatning

Ein mann i 20-åra dømd etter å ha tent på eit stereoanlegg i 3. etasjen i Drageset-bygget i Os sentrum.

Av: Andris Hamre

I Bergen tingrett i slutten av april blei ein osing i byrjinga av 20-åra dømd for grove narkotikabrot og grovt skadeverk gjennom å ha dynka og tent på eit stereoanlegg inne i Torggata 2.

Les òg: 

Sprang ut bakdøra då politiet kom 
Tok heisen, lagde bål og stal øl 

– Måndag 23. mars 2015 om kvelden i Torggata 2 i Os i Hordaland, stabla han delar av eit stereoanlegg opp mot ein vegg, dynka dette med tennvæske og tente på. Det oppsto brann og røykutvikling, overrislingsanlegget løyste seg ut, og bygningen blei påført skader for tilsaman kr 782.655, heiter det i tiltalen.

Hugser lite

Tiltalte møtte i retten og erkjende seg skuldig etter tiltalen.

I retten forklarte tiltalte at han ikkje hugsa så mykje frå hendinga då brannen blei påsatt. Han forklarte i retten at han hugsar at han gjekk inn på Joker-butikken, at han var inne på lageret og at han løp rundt. Han hugsar òg at han kasta to sekspakningar øl i elva før han blei tatt av politiet.

Han har sett overvåkningsbileter frå butikken og har forklart at det er han som er på bileta.

Tiltalte sine innrømmingar blir setta av politiet sine observasjonar og av den butikktilsette som var på jobb.

I retten blei det lagt fram laboratorieundersøking kor det blei påvist white-spirit eller tilsvarande på jakka tiltalte hadde på seg då han var i butikken.

– Samla sett finn retten bevist utover einkvar rimeleg og fornuftig tvil at det var tiltalte som stabla delar av eit stereoanlegg opp mot ein vegg i 3. etasje i Torggata 2, dynka det med tennvæske og tente på, konkluderer retten i dommen.

Skulle finansiera eige bruk

I tillegg til å vera tiltalt for å ha forårsaka brannen var mannen også tiltalt for grovt å ha erverva og/eller oppbevart narkotika.

I oktober 2016 kjøpte han tilsaman 59,23 gram amfetamin, 54,5 gram cannabis satvia, 5,58 gram cannabisharpiks, 11 tabletter inneholdande amfetamin, 0.20 gram MDMA og 0,07 gram DMT.

Han skal også ved eit anna tilfelle ha kjøpt 195,24 gram cannabisharpiks.

Stoffet blei beslaglagt av politiet etter ransaking heime hos mannen.

I retten forklarte mannen at narkotikaen tilhørte han og at det meste skulle selgast for å finansiera hans eige forbruk.

Dømd til betinga fengsel og erstatning

Mannen er no under rusbehandling og retten dømde han til betinga fengsel i 10 månader med ei prøvetid på tre år med særskilt vilkår at han gjennomfører narkotikaprogram med domstolkontroll nærare fastsatt av Kriminalomsorgen.

Han blei òg dømd til å betala erstatning til Gjensidige Forsikring ASA på kr 782.655 som er utbetalt til utbedring av vann- og røykskader og 15.000 kroner i erstatning til Torggata 2 AS som dekning av deira eigenandel til forsikringsselskapet.

Fleire saker