(Ill. foto: KVB)

Mann lagt i jern på utestad

• Ber om tips etter MC-ulykke
• To hjortepåkøyrslar på éin dag
• Fyll, men ikkje så mykje tull i sentrum

Av: Kjetil Vasby Bruarøy

Fredag ettermiddag, litt før lokka 17, rykte politi og ambulanse ut på melding om MC-ulykke i Nordstrøno.

MC-førar, ein mann i siste halvdel av 20-åra, var bevisst og oppegåande, men blei frakta til sjukehus i ambulanse.

– Han har førarkort og var edru, men vi undrast over korleis uhellet skjedde. Vitne på staden fortel at motorsykkelen var nær kollisjon med bil, men vi har ikkje snakka med bilførar, og vi ønskjer kontakt med både vedkomande i bil og eventuelle andre vitne, seier politioverbetjent Atle Birkeland.

Vist vekk frå Os sentrum

I samband med oktoberfest har det vore ekstra mange ute i Os sentrum i helga, spesielt om laurdagen.

– Det har ikkje vore mykje bråk, og heller ingen alvorlege hendingar.

Fredag kveld, i 22.30-tida, blei politiet tilkalla då ein mann var trugande ovanfor tre vaktar etter å ha blitt kasta ut. Han var vekke då politiet kom til staden.

Litt over klokka 2 blei to personar kasta ut av ein utestad, men insisterte på å koma inn igjen. Dei skal ha oppført seg fint, og gått frå staden, då politiet kom.

Litt over midnatt natt til laurdag blei ein mann lagt i jern inne på ein utestad. Politiet kom til plassen, og gav mannen pålegg om å fjerna seg frå Os sentrum.

Mann frå Stavanger køyrde utan førarkort

Laurdag litt før klokka 15 blei ein bilist stoppa på E39 på Søfteland.

Bilførar, ein mann i 30-åra frå Stavanger, mista førarkortet i september. Han måtte setja frå seg bilen og er meldt.

Hjort påkøyrd på Søfteland og i Hegglandsdalen

Klokka 22.30 fredag kveld blei ein hjort påkøyrd på E39 ved Er-An.

Bilen fekk ein liten bulk, hjorten stakk frå staden. Viltkontakt blei varsla.

Ein time seinare fekk politiet melding om påkøyrd hjort i Hegglandsdalen. Også denne hjorten skal ha sprunge vidare etter samanstøyten.

– Vedkomande i Hegglandsdalen varsla dagen etter. Det er bra dei seier ifrå, men det skal helst skje med éin gong. Dessutan skal staden merkast, så ettersøk kan gjennomførast effektivt, seier Birkeland.

Fleire saker