Parkfesten på Moldegaard hadde fint vêr og godt besøk.

Moldegaard delte ut 57.500 kroner

Mange søkjarar og strålande parkfest då fondet hadde årets utdeling.

image
image
image
Av: Kjetil Vasby Bruarøy

Søndag blei årets parkfest på Moldegård arrangert. Parkfesten er ein gratis familiedag med konsert og utdeling av midlar frå Moldegaaardsfondet.

• Bakgrunn: Har du høyrd om Moldegaardsfondet?

«Moldegaardsfondet til Osbygdens Vel» blei etablert av Johan Ludwig Mowinckel (1870-1943) 18. august 1930 - og skal tilgodesjå oppgåver «til Osbygdens gagn og forskjønnelse».

I år blei det delt ut ekstra mykje midlar, til saman 57.500 kroner fordelt på tre mottakarar.

– Vi deler aldri ut alt som står fondet, men tar etter kva som kom inn året før. I forkant av årets parkfest var det ekstra mykje pengar som kom inn, ikje minst fordi vi, då svigerfar (Johan Reksten) døydde, ba om pengegåve til fondet heller enn blomar. Det kom inn pengar frå heile verda, fortel Synnøve Reksten Mowinckel.

Desse fekk midlar frå Moldegaardsfondet i 2018:
• Os Roklubb: 10.000 kroner til utbetring av brygger og rastebord i Sigurdsvika i Ulvenvatnet.
• Os Musikkforening: 17.500 kroner til gjennomføring av seminar.
• Os Ungdomslag: 30.000 kroner til utbetring av steinbygningen i Steindalen.

I 2017 var det éin søkjar og éin mottakar, Røde Kors fekk 10.000 kroner i støtte til kjøp av ny minibuss. Året før var einaste utan parkfest, og det kom lite midlar inn.

– I år hadde vi heile 14 søkjarar! Enkelte var private prosjekt og kunne ikkje, ifølgje statuttane i fondet, bli vurdert. Men alle var gode prosjekt som fortener støtte, synest Synnøve.

Fekk inn nye 30.000 kroner

Ordførar Marie Lunde Bruarøy sto for utdelinga av midlane, Noregs beste brassband, Eikanger-Bjørsvik Musikklag, sto saman med Os Musikkforening for den musikalske stemninga.

– Vêret var fint og mange deltok på festen! Dessutan var gjevargleda stor. Når vi no har byrja å bruka vipps fekk vi både mange små og mange store beløp, frå 100 kroner til fleire som gav 5000 kroner.

Det kom inn i alt nesten 30.000 kroner.

– Det er ein høg sum, men som venta kom vi ikkje opp i same beløp som då Johan gjekk bort. Det betyr at vi har bra med midlar å gje vekk neste år òg, om ikkje det blir fullt like mykje som i år.

– Men det er jo mogleg at det kjem gåvegjevarar også no etter parkfesten, så svaret har vi ikkje før vi nærmar oss juni 2019. Vi synest uansett at det er kjekt med alt det positive initiativet i Osbygda, og at folk kan koma opp her og sjå kva fondet er med og støttar.

Fleire saker