Nærmar seg 20 gradar i sjøen
Fersk måling frå tre stadar i Bjørnafjorden.
Vêret blei som varsla fint og heitt frå midten av veka. Onsdag blei det ifølgje BT registrert 25,3 gradar onsdag og 26,1 gradar torsdag.
I dag skal det bli endå varmare, men korleis er badetemperaturane?
Bjørnafjorden kommune har ingen måling i år, men på Badetassen.no er det tre oppdateringar frå Bjørnafjorden i 12-tida i dag:
Mobergsvikjo: 19,1 gradar
Peraneset: 19,6 gradar
Vinnesholmen: 18,5 gradar
Kommunen sjekkar ikkje temperaturen, men måling av vasskvalitet held fram.
– Vi skal ta målingar i neste veke og seinare i sommar. Det hender sjeldan eller aldri at den er dårleg, men om nokon observerer utslepp eller noko som liknar forureining, ber vi dei kontakta teknisk vakt, seier einingsleiar Agnete Haugland.
Temperaturen på land er venta å gå ned til rundt 16 gradar laurdag, men skal opp igjen på over 20 gradar søndag og måndag - då med fare for nedbør.