Nærmar seg 400 selte billettar

På same måte som første juledag-suksessen til Catten, at osingane ikkje har gløymd dei legendariske åra med Jada-ballet, er det tydelegvis mange som har vesle nyttårsaftan i ryggraden når det kjem til festar dei ikkje vil gå glipp av i jula.

– Etter årevis med fullt hus i Fjellheim gjekk vi i Osøren Blues og Jazzfestival-tida opp i 500 første året i Oseana. No kan det sjå ut som om vi passerer dette, seier Tor Egil Hylland frå Osfest.Arrangøren gler seg over godt førehandsal til Gina Aspenes, Pogo Pops og Rolling Clones onsdag.

– Vi har selt nesten 100 den siste veka og passerte 340 selte billettar måndag formiddag. Eg hadde trudd at 70 prosent av billettane skulle seljast i døra, men det vågar eg ikkje håpa på no.

Konserten er i Nore Neset Aktivitetshus, i sjølve hallen, og arrangørane rustar seg for opptil 1000 gjestar.

Tidleg start og trygg retur

Dørene opnar klokka 18, med vorspiel i Symrasalen for dei som er tidleg ute.

– Vi håper flest mogleg kjøper billettar på førehand, så det blir minst mogleg kø for å koma inn.

– Og så håper vi på mest mogleg betaling med kort i baren, at ikkje vi kjem skeivt ut med vekslepengar. Vi har fire betalingsterminalar, så det skal gå bra.

Konsertarrangørane skjenkar til klokka 2 og set opp bussar både til Os sentrum og til krinsane, i samarbeid med Os Taxi.

I løpet av kvelden kjem Osfest til å sleppa ei handfull artistar til Osfest 2016.

Frå før er det klart at både Vamp og Marcus og Martinus speler under Osfest 4. til 6. august neste år.