Nekta å fjerna seg frå båt - fekk 8000 kroner i bot

Politiet i Os fortel om ei ryddig gjennomføring av Torgfesten, dei 600 gjestane på den vesle musikkfestivalen hadde saman med skuffa Liverpool-fotballsupportarar ikkje problem med å oppføra seg.

Nokre innslag i kassen blei det likevel også for politiet i løpet av helga.

Fekk 8000 kroner i forelegg

Fredag i 21.30-tida kom politiet i kontakt med ein mann på ei av bryggene i Os hamn. Han var i eit festleg lag om bord på ein båt.

– Mannen, som er i 50-åra, fekk pålegg om å fjerna seg, men retta seg ikkje etter dette.

– Han blei køyrd i arresten og blei meldt for episoden, og vedtok eit forelegg på 8000 kroner, fortel politioverbetjent Audun Hadler-Olsen.

I 3-tida natt til laurdag blei ein mann i 30-åra sendt i marsj etter ein krangel på eller utanfor ein utestad. Han retta seg etter pålegget frå politiet om å fjerna seg og å halda seg vekke.

Vist vekk frå privatfest på Nore Neset

Natt til søndag fekk politiet melding om ein privat fest i ein bustad på Nore Neset som var kome litt ut av kontroll.

– Det var eit festleg lag med ein del ungdom på 18-20 år. Nokre personar som ikkje var velkomne på staden blei viste vekk.

Tatt for urinering

I 4-tida natt til søndag blei ein mann tatt for urinering på offentleg stad.

Ein mann i 50-åra kan venta seg ei god bot etter urineringa, som fann stad på bussterminalen i Os sentrum.

Rusa bilførar med marihuana i lomma

Søndag i 19-tida stoppa UP ein bil i Os sentrum.

Bilførar, ein mann i 30-åra, er mistenkt for køyring i rusa tilstand.

Det blei òg funne mindre mengder marihuana på mannen.