Ny bootcamp klar for opning

Bildeserie:

1 av 4

Energi Trening i Hamnevegen er bygd om med eiga avdeling for ekstern samarbeidspartnar.

– Medlemstalet har auka bra i det siste, no har vi rundt 1000 medlemmar, fortel dagleg leiar ved Energi Trening Os, Renate Færøy.

Avdelinga inst i lokalet var noko romsleg, og med fleire syklar enn det som var i bruk. No er veggen flytta og utstyret henta ut i den opne avdelinga, mens nyinnreidd lokale står klart til Bootcamp Os.

– Det har vore ein del interesse for gruppetimar. No får vi eit tilbod til både eksisterande og nye medlemmar.

Stor suksess på Askøy

Daniel Hylland har drive bootcamp for befal og menige i Forsvaret, vore PT-ansvarleg og hatt bootcamp for sivile saman med Robin Stordal på Askøy. Stordal var PT på Energi Trening på Os før han starta Bootcamp i eige lokale hos Energi på Askøy.

– Det har tatt heilt av på Askøy, der er vi no oppe i 34 timar i veka, fortel Robin.

Når Bootcamp Os opnar i morgon er det med Daniel som sjef. Bootcampen tilbyr eige medlemsskap, eller som ei utviding av Energi-medlemsskapen.

– Uthald og styrke med naturlege rørsler

Bootcamp Os er utstyrt med manualar, kettlebells, Ski Ergo (Concept 2), romaskiner (Skill Row frå TechnyGym) og ei tredemølle vi helst ikkje skal kalla tredemølle (Skill Mill).

– Den ser gjerne ut som ei tredemølle, men den er utan motor, og med ein boge som gir eit meir avlastande steg.

– Med gode handtak i ulike høgder er den eigna for ei rekkje ulike øvingar, seier Daniel og bøyer seg fram mens han trør til, omtrent som om han skubber ein bil som skal startast på gir.

Bootcamp bruker, som det varemerkebeskytta systemet «CrossFit», både eigen kroppsvekt og ulike apparat. Øvingane er henta frå blant anna vektløfting, styrkeløft, kettlebell og strongman-program.

– Vi kjem til å ha grupper på opptil 16 personar. Ingen økter er like, men alle passer for dei fleste, folk styrer belastinga ut frå eigen styrke.

– Treninga er intensiv, rørslene er naturlege. Bootcamp gir funksjonell styrke og uthald, også i samband med andre idrettar, seier Hylland.