Ny nettverksgruppe for ungdomsforeldre

Neste månad kan du som ungdomsforelder nytta tilbodet «Foreldre møter foreldre».

Nettverksgruppa er eit gratis tilbod til barn og foreldre. Gruppa skal vera ein stad du kan få støtte og råd i foreldrerolla.

Tilbodet inkluderer middag og aktivitetar for barna.

Ein plass å bygga nettverk

– Vi ønsker at flest mogleg skal ha det bra. Denne gruppa skal vera ein plass du kan bygga nettverk, få råd og finne støtte i kvarandre, fortel diakon Ingrid Vik til Midtsiden.

Tilbodet startar 7. februar og er retta mot foreldre til ungdom mellom 13 og 18 år.

Til saman blir det 8 samlingar av nettverksgruppa, og dei som melder seg på får vere med på alle samlingane.

I kvart møte blir det tatt opp eit nytt tema.

Korleis forstå ungdomen sine behov og følelsar? Korleis snakka med ungdomen på ein god måte? Korleis vere ein tydeleg vaksen? Korleis ta vare på deg sjølv som forelder?

Dette er blant nokre sentrale spørsmål foreldre kan diskutera på møtane.

Tema blir deretter diskutert mellom foreldra, familierettleiar frå Bjørnafjorden kommune og diakon i Os kyrkjelyd.

– På eit av møta kjem ruskonsulent i Bjørnafjorden kommune, Carl-André Dahl, for å snakka om grensesetting, rus og mediabruk, fortel Vik.

Lågterskeltilbod

Tilbodet er ope for alle foreldre, uavhengig av livssyn, livssituasjon og av om ein allereie mottar tenester frå hjelpeapparatet i dag.

– Dette er eit lågterskeltilbod. Alle som ønsker å nytta seg av tilbodet kan melda seg på.

Ved å møte andre menneske, snakka ope og dele erfaringar, gleder og bekymringar, kan du både få støtte og vere ei støtte for andre.

– Det er inkludert middag, noko som gjer det lettare for foreldra og barna å koma rett frå jobb og skule.

Vaksne aktivitetsleiarar vil vere med barna heile tida og legge til rette for at dei har det kjekt og trygt.

Barna kan spele bordtennis, spel, gjere lekser og andre aktiviterer medan dei vaksne snakkar saman.

Påmelding fortløpande og innan 30. januar 2023.

«Foreldre møter foreldre» er eit samarbeid mellom Bjørnafjorden kommune og Os kyrkjelyd, og er finansiert med midlar frå Bufdir.

Påmeldingsskjema og meir informasjon er på kommunen si heimeside.