Ole Jørgen er nominert til nasjonal trenarpris

Elverum håndball, Norges fremste innen herrehandball dei siste fire åra, har lyst ut ein nasjonal konkurranse for å hylla unge trenartalent.

«Er du den neste Børge Lund» spurde dei i nominasjonsprosessen som starta i oktober.

Børge Lund, som var proffspelar i Tyskland frå 2006 til 2013, har seinare vore assistenttrenar for landslaget og trener i dag Elverum sitt herrelag.

No kjempar 37 unge handballtrenarar om prisen.

Ein av dei er Ole Jørgen Olsen, trenar for Os jenter 15 og sportsleg leiar i Os Handball.

– Eg har fått veta kven som nominerte meg, ein av spelarane, Nora Hanken, fortel Ole Jørgen.

– Det var stas, og det hadde vore veldig kjekt å vinna turen.

Her kan du sjå alle kandidatane og stemma på din favoritt.

Ein jury frå Elverum sin samarbeidspartnar Veksthuset Personal AS skal velja kandidaten ut frå ein av dei fem som får flest stemmer.

Vinnaren får besøka Elverum Håndball sitt trenarteam med Børge Lund og Raymond Hamar, og får eit innblikk i korleis laget jobbar taktisk, fysisk og mentalt.

Ole Jørgen har i skrivande stund 103 stemmer.

Han ligg på 9. plass, men vegen er kort til litt klatring i rangeringa.

Knappe 30 stemmer skil Ole Jørgen frå 6.plass, mens han treng 57 stemmer for å tangera 5. plassen.