Medeigar Christoffer Sunde og dagleg leiar Anne Louise Klever Sivertsen på opningsdagen. (Foto: Kjetil Vasby Bruarøy)

Opna bakeri nr 180 - med 10 tilsette frå Os

Pizzabakeren Os er allereie ein mellomstor og lokal arbeidsgjevar.

image
image
image
Av: Kjetil Vasby Bruarøy

Sidan 2015 har det kome 13 nye Pizzabakeren-utsal i bergensområdet. Servicebakeriet AS eig 8 av desse, og opna i formiddag nummer 9 på Os.

– Vi veit at Pizzabakeren har vore i Os før, men det er òg alt vi veit. Det var ikkje i vår regi. Vi opplever vekst og god marknad for varene våre, og ser veldig fram til å etablera oss på Os, sa Preben Gulliksen til Midtsiden i mars.

I dag er det òg opning i Skien, som saman med Pizzabakeren Os er nummer 179 og 180 i rekkja. Kjeda blei starta av Preben sin far, William Gulliksen, som starta sin første pizzarestaurant i Hundvåg nord for Stavanger, ein restaurant som no er 27 år.

Gründeren William var i går i Os i samband med prøvesmaking for inviterte gjestar, mens opninga var i dag. Preben eig Servicebakeriet AS saman med to brør og kameraten Christoffer Sund, som har flytta til Bergen for å følgja med bakeria i bergensområdet.

Målretta besøk av dei første gjestane

Då Midtsiden var innom i 12-tida var fire jenter frå 9. klasse i ferd med å bestilla seg lunsj.

– Vi fekk avspasering på skulen og ville oppom her, ikkje fordi det er opningsdag, men fordi det er favoritten vår.

– Spesielt bunnen er veldig god. Vi kjøper denne pizzaen når vi er på Lagunen, og er glad for at dei kom til Os, fortel Mathea Sperrevik og Andrine Lekven.

Ny og erfaren bemanning

Pizzabakeren byr, med unntak av kyllingklubber og kvitløksbrød, utelukkande på pizza. Kvar restaurant har eige bakeri og alle bunnar, med unntak av den glutenfrie, er bakt lokalt. Pizzabakeren har dessutan små variantar, dei minste og billigaste pizzaene koster berre 39 kroner.

Dei har ikkje eigne bord, bortsett frå ventebord innandørs og to som skal koma ute, all mat må hentast eller køyrast ut.

– Vi har to bilar no i starten, så får vi sjå om det blir behov for fleire. I appen kan dei som bur innan 4 km radius bestilla, dei som bur utanfor må ringa inn, seier Christoffer.

Christoffer reiser rundt og jobbar ved alle dei 9 bakeria i bergensområdet. Dagleg leiar i Os er Anne Louise Klever Sivertsen frå Fana.

– Eg jobba på Pizzabakeren på Lagunen før eg fekk jobben her, og skal no flytta til Os, fortel ho.

Biff og bacon har vore bestseljaren på Lagunen, no er Anne Louise spent på kva osingane liker. 

– Alle dei andre tilsette er frå Os, den yngste er 17 år. Det er kjekt å kunna vera den første, eller ein av dei første, arbeidsgjevarane til ungdom. I går fekk nokre av dei prøvekøyrd kjøkkenet til prøvesmakinga vi hadde, no reknar vi med å få det gradvis meir travelt inn mot helg, seier Frode, ein av Gulliksen-brørne som i dag var i Os for å få med seg opninga.

 

 

 

Fleire saker