Opna sin nest største butikk

Bildeserie:

1 av 4

Måndag 13. oktober var det kroken på døra for Osbutikken, som dreiv Mekk i Os, i går opna Wallendahl butikk i lokalet i 1. etasje på gateplan i Amfisenteret.

– Dei første varene kom måndag, dei siste fredag klokka 18. Men vi kom i mål til klokka 21 på kvelden, fortel butikksjef Knut Johansen.

Johansen har jobba 7 år for Wallendahl, dei siste åra som butikksjef. Han er midlertidig sjef på Os til ny leiar er tilsett.

Den vesle bergenbaserte kjeda har, forutan to Tilbords-butikkar, åtte butikkar medrekna den nye på Os.

– Dette er den nest største butikken vår og vi er veldig nøgd med lokalet. Vi har fått plass til mykje varer og har samtidig greit med luft mellom hyllene.

«Sinnsjukt mykje kult»

Wallendahl driv jernvare med blant anna verktøy, kjøkkenvarer og maling. Midtsiden var innom to timar etter opning og då var det bra trafikk inn og ut av butikken.

– Vi har fått fine tilbakemeldingar, både før opning for at vi etablerer oss her og i dag. Men den mest morosame overhøyrde eg ute i butikken; «dei har sinnsjukt mykje kult her» var det ein som sa.

Fryktar ikkje konkurranse

Det er nesten 200 år sidan Ellert A. Wallendahl opna sin første jernvare i Bergen.

At Amfisenteret allereie har tre butikkar med kjøkkenvarer, og at det er fleire større innan jernvare og verkstøy i Os, skremmer ikkje den nye butikksjefen.

– Vi opna nyleg butikk på AMFI Voss, nær fleire i same bransje, og det har fungert heilt fint, også for konkurrentane. Eg har tru på at det same vil gjelda her i Os, seier Johansen.