Opnar opp mot nord
Amfi Os er desse dagar i gang med ei etterlengta oppgradering utandørs.
Senterleiar Silje Lygre fortel at planane har vore klare i fleire år, men at dei no med tilgjengelege midlar, endeleg kunne ta fatt på ei oppgradering av parkeringsplassen mot nord.
– Dette er noko vi har hatt lyst til å gjera lenge, og eg gler meg til å sjå det ferdige resultatet, seier Lygre.
– Hekken som står der no har vorte mykje større enn planlagd med åra, så den skal vika for ny beplantning. Vi kjem òg til å setja opp gjerder og oppgradera belysninga på området.
– Ferdig kjem området til å verta både finare og betre, både for kundar og naboar, seier Lygre.
Ferdig til jul
Arbeidet vert utført av Os Hageservice.
– Dei er utruleg effektive, fortel Lygre, og sidan dei jobbar seg stykkevis over området, er det få parkeringsplassar som vert vekke under oppgraderinga.
Den «nye» parkeringsplassen skal stå ferdig i god tid til årets julehandel.