Ordførarbyte i dag

Fredag 31. august gjekk Terje Søviknes av som olje- og energiminister.

• Les òg: Siste dag som statsråd

I dag trappa Marie Lunde Bruarøy ned frå ordførar til varaordførar.

• Les òg: – Skulle gjerne vore ordførar ei stund til

Skrudde av brytaren i Oslo

Betre tid til familien var årsaka til at Søviknes ba om avskjed i nåde frå regjeringa. No har han hatt fri i to veker, og det har vore få telefonar frå regjeringskvartalet i overgangen.

– Eg hadde eit overtakingsmøte med påtroppa statsråd Kjell-Børge Freiberg, resten har embetsverket tatt seg av. Det er fordelen med det norske systemet, samanlikna med for eksempel USA, at administrasjonen i kvart departement i hovudsak blir sitjande. Ved skifte av leiar held vi i Noreg likevel god kontinuitet i arbeidet, seier Terje Søviknes.

Også privat, det å flytta ut av leilegheita, var kort prosess.

– Som statsråd blei det så mykje reiseverksemd at det einaste eg hadde å pakka med meg var ein koffert og handbagasje. Etter to år.

Mjuk landing - og litt jobb

Med to veker fri har Søviknes fått omstilt seg til ordførarmodus.

– Kva har du brukt tida på?

– Eg har lese ein del dokument, og eg har hatt møter med Bruarøy og rådmann Fotland. Men først og fremst har eg hatt fri, vore med Anne (kona) og ungane, og fått gjort ein del praktisk arbeid i hus, hage og naust. Hummarteinene står klare til sesongstart.

Privat har han fått kommentar på at det er tydeleg at han no har landa.

– Anne meiner eg er rolegare, blidare og, ikkje minst, meir til stades. Det forstår eg. Sjølv om det å vera ordførar òg er ein 24-7-jobb, så er det eit anna press på deg som statsråd.

I tillegg til arbeidsoppgåvene er medietrykket eit anna.

– Det er ikkje berre når det skjer noko, det er konstant. At NRK, VG og TV2 ringer er det minste, internasjonal fagpresse står for ein stor del av mediemerksemda. Som statsråd for olje og energi skal du ikkje berre vera tilgjengeleg, du må vera veldig presis. Marknad og børs kan bli påverka av det du seier, og då bør du ikkje seia noko som er feil.

Vil berre vera «Marie»

Avtroppa ordførar Marie Lunde Bruarøy var tydeleg då det blei klart at Søviknes kom tilbake, ho kunne tenkt seg å vera ordførar ei stund til.

– Ja, det er ein 24-7-jobb, og ja, eg fekk mange spørsmål om korleis det ville bli å prøva å fylla Søviknes sine sko.

Søviknes har vore ordførar sidan 1999.

– Eg svarte at eg ikkje skulle fylla andre sine sko, eg ville berre vera Marie. Sjølv om folk ser på deg som ordførar døgnet rundt, uansett kva setting du er i, har eg heller ikkje vore redd for å vera meg sjølv når eg har hatt fri. Du skal te deg, når du har ei rolle som denne òg, men eg meiner at du skal kunna vera ein privatperson i private samanhengar.

No er det tilbake til 30 prosent stilling som varaordførar, med kontortid på rådhuset kvar måndag og onsdag. Dei andre dagane er det tilbake til frisørsalongen ho no eig. Første dag i salongen blir tysdag om ei veke.

Overtar ein «ny» kommune

Det er ein audmjuk Søviknes som no får tilbake sjefsstolen etter Bruarøy. Bygda har ikkje stått stille i to år.

– Fellesnemnda er oppretta etter at Søviknes blei statsråd, og arbeidet med kommunesamanslåinga er den største og mest krevjande oppgåva som ventar han, seier Marie.

– Eg synest Marie har gjort ein kjempejobb. Ho og Laila (varaordførar Reiertsen) har leia mange og store oppgåver desse åra, seier Terje.

– Ved sidan av kommunesamanslåing er Os åleine ein dynamisk kommune. Nye leiarar er på plass internt og sjølve kommunen er i kontinuerleg endring. Det må eg ta til meg når eg no tar fatt på dei første oppgåvene, seier Terje.

– Kva gler du deg mest til å jobba med?

– Ved sidan av kommunesamanslåinga, som i grunnen overskyggar alt anna, er det prosjektoppgåvene. Eg har jobba med store prosjekt i Oslo òg, men som statsråd er det på eit anna plan, og på ein annan måte. Lokalt får du sitja tettare på prosjekta, og det liker eg godt, seier Søviknes på sin første dag tilbake i ordførarstolen.