Pause og full rulle

Lysekloster IL si para-gruppe, Full Rulle, har fått fine, nye benkar på plass i den populære lysløypa ved idrettsanlegget.

Kjetil Vasby Bruarøyfredag 02. juli 2010 06:35

For to år sidan sto det nye idrettsanlegget i Lysefjorden ferdig. Idrettslaget har eiga para-gruppe, kalla Full Rulle, og desse var med i planleggingsarbeidet frå start.

- Både vi i styret og nokre av dei funksjonshemma sjølv kom med ønskje og tips til god utforming. Anlegget har både parkering og tilkomst til tribune for rørslehemma, men vi ville også legga til rette for at funksjonshemma ikkje berre skal vera tilskodarar, seier leiar for Full Rulle, Ann Jarlsdatter.

Toalett og garderobe for rørslehemma er på plass. Den 700 meter lange lysløypa ved anlegget er populær, også blant rullestolbrukarar.

- Mange tar det å gå tur som noko sjølvsagt, men er du gamal, har ei barnevogn med deg eller har problem med rørsle eller syn, så er det ikkje like lett å gå tur i skogen lenger.

- Løypa er med rett stigning tilpassa rørslehemma.

Kjøpte kvileplassar
Para-gruppa, som er del av friidrettsgruppa i idrettslaget, men med eigen plass i styret, har fleire planar for vidareutvikling av både idrettsarenaen og turløypa.

- Vi ønskjer oss både leielist for svaksynte og lydpostar for blinde, folk med dysleksi og ungar som ikkje kan lesa. Det får koma med tida, no gler vi oss over å ha fått nye benkar på plass.

Torsdag kom Os Asvo og leverte fire nye benkar til laget. Os Asvo står for både design og produksjon.

- Pengane til benkane samla vi inn på ein spontanaksjon då anlegget var nytt. 30.000 kroner kom inn, og bedrifter som har sponsa har fått namnet sitt ved benkane.

Full Rulle gjekk til den lokale produksjonsbedrifta for å få skreddarsydde benkar.

- Dei har vore utruleg flinke og engasjerte, og kom sjølv og leverte og hjelpte til med å få dei på plass. Vi delte ut is og gullmedaljar som takk for hjelpa, fortel Ann Jarlsdatter.