Prisen har auka - Os kommune vurderer å gå inn med 5 nye millionar

Nye kalkylar frå Statens vegvesen syner at ny bru over Valla-elva langsmed Fv 137, Hegglandsdalsvegen vert 10 millionar kroner dyrare enn tidlegare kalkulert.

Den nye brua, med gang-og sykkelsti er ein del av den planlagde opprustinga på strekninga Hauge - Valle-brua.

Fylkeskommunen tilrår ei billegare løysing

Den nye vegen er planlagd med følgjande finansieringsmodell:

• Totalkostnad – 36 mill.

• Os kommune - 5 mill ( tidlegare tilskot )

• Hordaland fylkeskommune – 13 mill.

• Søknad tilskuddsordning om statlige sykkelmidler - 18 mill

Per dags dato er kostnadskalkylen 41 mill kroner.

I ein e-post til Os kommune (det står 27.03 som dato i sakspapira, vi reknar med at det er ein tastefeil), skriv Hordaland fylkeskommune (HFK) at dei meiner skal vera mogleg å halda seg innanfor den tidlegare kostnadsramma på 36 millionar kroner for heile prosjektet. Dette skal løysast med å bygga ei seperat gang- og sykkelbru på sida av eksisterande veg. HFK skriv vidare at dei har allereie har strekt seg langt i saka, og at det i tillegg er andre store behov i Os. HFK vil ikkje motsetja seg at Os kommune går inn med yttarlegare 5 millionar kroner for å finansiera ei kombinert bru med plass til både bilar og dei mjuke trafikantane

Vil sikra Borgafjell barneskule

I kveld skal formannskapet ta stilling til om dei skal tilrå kommunestyret å løyva yttarlegare 5 millionar. Dette i tillegg til dei 5 millionane som allereie er løyvd frå kommunestyret.

I framlegget til saka er ei tenleg tilkomst for den nye skulen på Hjelle, Borgafjell barneskule, framhevd som grunnlag for ekstraløyvinga. Administrasjonen tilrår at midlane vert å henta frå overskot på drifterekneskapen for 2018.

HFK si løysing er ikkje vegen å gå

Ordførar Terje Søviknes sit oppteken i fylkestinget i dag, men i ei tekstmelding skriv han til Midtsiden:

– Fylkeskommunen sitt forslag om å bygga ein enklare, seperat gang- og sykkelveg over Valla-elva vil vera ei dårleg løysing. Då måtte vi ha brukt den gamle køyrevegen med krappe svingar. Dette ville ikkje ha tent den vidare utviklinga av Hjelle-området (med barnehage og etterkvart ny skule) og Hegglandsdalen med nye næringsareal og vidare bustadbygging. I tillegg er denne vegen ein del av fastlandsforbindelsen vi i dag har til Fusa via Samnanger.