Rigginga er i gang

Bildeserie:

1 av 3

Torsdag kveld starta rigginga til årets Osfest som går av stabelen 31. juli og 1. august. Då kom festivalkontoret opp utanfor det gamle kommunehuset på kyrkjeflaten.

– Frå i morgon klokka 12 skal vi vera operative i festivalkontoret. Då kan frivillige komma og hente t-skjortene sine og få tildelt arbeidsoppgåvene, fortel festivalsjef Tor Egil Hylland.

Festivalkontoret vil vera ope til klokka 16 laurdag og mellom 15 og 18 måndag og tysdag. Onsdag utvidar dei opningstida frå 15 til 21 før dei held det ope heile dagen når det nærmar seg festivalen.

– I tillegg til å vera staden dei frivillige skal koma, blir det sjølvsagt sal av billetter, festivalpass og merchendise for publikum. Publikum er òg hjarteleg velkomne for å få informasjon om programmet, fortel festivalsjefen.

Større VIP-telt, større scene

I løpet av fredagen har resten av telta som skal nyttast under festivalen kome på plass.

– VIP-teltet som står utanfor Kløvertun har blitt større enn vi først tenkte oss. No er det på 450 kvadratmeter, så der er no kapasiteten utvida til omlag 700 VIP-plassar tenkjer eg. I tillegg til sjølve teltet får dei ein eigen bakhage kor det blir grilling og matservering, fortel ein entusiastisk Hylland når han viser Midtsiden rundt.

Oppe på grusplassen er serveringstelta kome på plass og dei første elementa til scene er òg på plass.

– I fjor hadde vi scene-traileren her. Den skulle vi eigentleg ha i år òg, men det har blitt dobbeltbooka. Difor får vi i staden ei byggjescene, den same som dei nyttar på Koengen. Om dei får på plass heile Koengen-scenen eller om dei byggjer den litt annerleis veit eg ikkje. Det som er sikkert er at den blir enno større enn den vi hadde i fjor.

Har passert 600

Hylland fortel at billettsalet går jamt og trutt.

– Vi har no passert 600 selde billettar til kvar av dei to dagane. Framleis er det billettar å få til dei fleste arrangementa. Cruiset med Halvdan Sivertsen er fullt, men på dei andre er det framleis plassar. Det er berre å vera om seg og bestille både cruise, VIP- og festivalpass på billettservice, avsluttar Tor Egil Hylland.