- 22. mars 2021

Rusa kvinne tatt etter forbikøyringar på Halhjemsvegen

Rakk ikkje ferja likevel.

Rusa kvinne tatt etter forbikøyringar på Halhjemsvegen
Ei kvinne som skulle nå ei ferje blei stoppa etter forbikøyring på E39 Halhjemsvegen. Ho viste seg å vera rusa. (Arkivfoto: KVB)
Kjetil Vasby Bruarøy
Kjetil Vasby Bruarøymandag 22. mars 2021 08:33

I 23-tida laurdag kveld observerte politiet ein bil som gjennomførte fleire forbikøyringar på E39 Halhjemsvegen.

– Forbikøyringane såg ikkje heilt gode ut, så bilen blei stoppa, fortel politioverbetjent Atle Birkeland.

Bilførar, ei kvinne i 30-åra, har ikkje førarkort og framsto som rusa.

– Vi mistenker at ho var rusa på andre ting enn alkohol. Det blei òg funne nokre narkotiske tablettar i bilen.

Kvinna, som var på gjennomreise, hadde ambisjonar om å nå ei ferje sørover. Den rakk ho ikkje, då det i staden blei ein tur til legevakt for utvida blodprøve.

Lett MC med to passasjerar

Natt til søndag stoppa politiet ein lett motorsykkel i Solbakken.

På sykkelen sat førar og to passasjerar, ingen av passasjerane hadde hjelm.

– Alle er under 18 år, så foreldre blei varsla. Det enda med forelegg til MC-førar og gebyr til begge passasjerane.

Mangel på lys og feil bruk av lys

Laurdag morgon i 05.30-tida blei ein bil stoppa i Os sentrum. Bilen køyrde med noko politiet meiner er feil bruk av kombinasjonen kurvelys og køyrelys, hadde ein del pynt hengande i speglet og raudt kupélys.

– Bilførar erkjente ikkje at lysbruken var feil, så han er meldt og det er oppretta sak.

Rett etter stoppa dei ein annan bilførar. Han mangla baklys og bremselys, noko han erkjente. Det blei forelegg og pålegg om å visa fiksa bil fram for vegvesenet.

Begge bilførarane er rundt 20 år gamle.

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • For heile familien (6 pers)
  • Utan bindingstid
  • Berre 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.