Rykte ut på bålbrenning og feststøy nyttårsaftan

På formiddagen nyttårsaftan rykte politiet ut for å sjekka eit større bål.

– Bålbrennar, ein mann i 60-åra, blei bedt om å varsla neste gong han skal brenna større bål, og å berre brenna hageavfall, opplyser politioverbetjent Christine Grindstein.

Det var hovudsakleg tre som blei brent. Det førte ikkje til annan reaksjon enn ei åtvaring.

• Les òg: Oppretta sak etter ulovleg bålbrenning (september 2020)

Politiet fekk berre to meldingar om støy frå fest nyttårsaftan. Den første kom allereie klokka 16.30.

– Dette var i Os sentrum. Det var tre menn i 30-40-åra på adressa. Dei fekk pålegg om å dempa musikken, og etterkom dette.

Klokka 02.30 kom melding om ei samling av ungdomar på ei anna adresse nær Os sentrum.

– Mengda gjestar innandørs var innanfor smitteverngrensa.

– Dei som var utandørs gjekk frå staden, og var heller ikkje ønskt på adressa av huseigar, ein mann i 20-åra. Dermed blei det heller ingen reaksjon eller pålegg delt ut, fortel Christine.