Sælen fekk sitt første stipend

– Det var ein ekstra kjekk epost å motta. Dette er det første stipendet eg har fått, seier Joakim Sælen.

Norenesingen, som går for TIF Viking, var ein av få søkjarar til det lokale rekneskapsfirmaet Partas AS sitt kulturstipend, og fekk måndag beskjed om at han får 10.000 kroner til støtte til utstyr og reiser.

– Han slit nok fort ut eit par sko, og bruker heilt sikkert mykje meir enn 10.000 kroner på reise. Men eg håper stipendet kjem til nytte, seier medeigar og dagleg leiar i Partas, Knut Haddal.

Tre veker i høgda

Fredag reiser Joakim til Frankrike med Team Viking for å trena i tre veker i høgda.

– Vi er fem utøvarar, to av oss er kappgjengarar, som reiser nedover med tre trenarar, fortel han.

Når han kjem heim ventar junior-NM på 5000 meter i Overalla første helga i august.

Ambisiøs og talentfull

Joakim har drive med kappgang sidan han var sju år, og dei siste åra har han hevda seg i fleire nasjonale konkurransar.

I februar tok han sølv i innandørs-NM og var suveren i vestlandsmeisterskapen med tida 23:14 på 5000 meter, i april slo han Trond Nymark sin 8 år gamle løyperekord i Ulvenmarsjen.

I juni fekk han bronse både på 10 km og 20 km i NM. På 20 km var han berre 16 sekund bak EM-kravet for U23 då han med tida 1.30,16 sette ny personleg rekord.

– Hovudmålet no er EM i 2014, seier Sælen.

– Eg har følgt med karriera til Joakim og er imponert over både prestasjonar og måla han set seg. Eg har sans for ambisiøs ungdom, seier Knut Haddal.

Deler ut nok eit stipend til hausten

Partas har fokus på unge individuelle utøvarar av kunst eller idrett i sitt stipend.

Formålet med stipendet er å stimulere til videreutvikling av lovende unge utøvere som har kommet til et nivå i egen utvikling der det kreves økonomiske ressurser utover det som er alminnelig. Stipendet skal knyttes opp i konkret satsing eller utviklingsprogram.

Sidan starten i 2011 har Partas delt ut 65.000 kroner i stipend. Til hausten blir det ny tildeling.

Desse har fått Partas' kulturstipend tidlegare år: Olav Skogen (alpinist), Richard Myhre Gåssand (musikk), Mathilde Sophie Sperrevik (ballett), Åsmund Slettevold (karate), Ingrid Søfteland Neset (fløyte) og Bjørn-Erik Ulvatne (klassisk song).