Same som Chelsea FC

I mai 2002 opna Os Turn den første kunstgrasbanen i kommunen, då dei med støtte frå kommunen og Trond Mohn fekk realisert kunstgras på den nedste banen på Kuventræ. Noko som den gong kosta omlag 5,5 millionar kroner. No har tida kome for å rehabilitera bana.

- Os Turn sine 40 lag, barneskulen med sine 250 elevar, Os vidaregåande med 450 elevar og fleire av barnehagane har brukt banen dagleg i løpet av dei 11 åra vi har hatt den.

- Kor mange brukstimar vi har hatt på bana tør eg ikkje ein gong å tenkja på, men at den no er utslitt og treng skiftast er det liten tvil om, fortel Hans Parnefält, nytilsett leiar i hovudlaget til Os Turn.

Viktig signaleffekt

Det at formannskapet tysdag bestemte å løyve 300.000 kroner frå formannsskapet sitt disposisjonsfond ser Parnefält på som eit viktig signal frå kommunepolitikarane.

- Dei har støtta 11-er banane rundt i kommunen med 500.000 kroner etterkvart som dei har blitt bygd.

- Det at dei no går inn med 300.000 kroner til rehabiliteringa er eit viktig signal om at kommunen også er med i neste runde, meiner Parnefält.

- Når vi var så heldige at Trond Mohn skjenkte oss ei bane i 2002, så er det er det viktig at vi tek godt vare på gåva. Difor sett vi stor pris på bidraget frå kommunen.

Håper på lånegaranti

Os Turn har òg søkt kommunen om ein lånegaranti på 770.000 kroner for å ta hand om mellomfinansieringa i påvente av staten sitt bidrag gjennom mva-kompensasjon og spelemidler. I si innstilling til kommunestyret er formannskape positive til å gje ein garanti.

- Sist vi handsama ein sak med garantisprørsmål krevde vi sikkerheit for garantien med pant i eigedommen. Det bør vi gjera her også, meinte Espen Aspenes (Frp).

- Kva om kommunestyret snur og ikkje gjev garanti, stoppar rehabiliteringa opp?

- Nei, men då lyt vi ut til kommeriselle aktørar eller næringslivet for å få hjelp til mellomfinansieringa, forklarar Parnefält.

Rimeleg og miljøvennleg

Os Turn har vald ei kunstgrasløysing frå IPAS Sport som forhandlar for ein kinesisk kunstgras-produsent. Kostnaden vil koma på omlag 1,3 millionar kroner inkludert mva.

- Eg ser andre reknar omlag 4 millionar på ei rehabilitering av kunstgrasbanar, så vi er godt nøgd med prisen.

- Vi får same type gras som mellom anna Chelsea har på sitt treningsfelt.

- Vi har òg vore i kontakt med Borås kommune i Sverige som har lagt graset på sine felt. Både dei, og idrettslaget som nyttar det anlegget melder tilbake at dei ser strålande nøgd med kvaliteten både med tanke på brukarane og dei som vedlikeheld det.

- I tillegg er det eit miljøvennleg gras. På grunn av konstruksjonen med dei korte tette grasstråa i botn treng ein berre halvparten så mykje gummigranulat (dei irriterande små svarte gummikulane, journ.mrk) som i ein tradisjonell kunstgrasbane, forklarar Parnefält.

Etter planen skal det nye kunstgraset leggast rett oppå det gamle. Leverandøren reknar med å starte arbeidet 15. april og bruka 8 til 10 dagar med monteringa avhengig av vêret.