Sesongens første siger

Etter tap i sesongens tre første kampar reiste damelaget til Os til Oslo for bortekamp mot Nit/Hak og Nordstrand.

Også i fjor var det to bortekampar i Oslo tidleg i sesongen, mot Nit/Hak og Rælingen, der Os reiste skuffa heim etter å ha tapt 27-25- og 22-21.

Denne gong blei det siger over Nit/Hak (27-29) og tap for Nordstrand (33-25).

– Det var veldig kjekt med siger, og sigeren kom i ein kamp der jentene verkeleg fekk vist kva dei kan, seier trenar Gitte Torp.

Mot Nordstrand hang Os også med, til pause sto det 14-14.

– Vi fekk ei utvising rett før pause, og fire utvisingar (2 min) i andre omgang. Det øydela rytmen vår litt.

Mange mål og nytt forsvar

Gitte fortel om ei god opplading til den første bortekampen.

– Vi tok fly bort på morgonen, og hadde sikra oss tilgang til hallen med det same vi kom fram. Der fekk vi tid til både å eta eit måltid og å gå oss ein lang tur for å få reisa ut av kroppen.

Før kampen har Os òg drilla inn eit nytt midtforsvar.

– Vi måtte ta nokre grep etter generasjonsskiftet vi hadde i sommar. Anna Martine Særvold Mjånes og Ayleen Akyüz Hagen er tatt inn i midtforsvaret, og løyste oppgåva veldig bra. Dei kjem berre til å bli betre i denne posisjonen, så dette lover bra for resten av vinteren.

Samtidig var Line Hjelle Berentsen i storslag, og skåra heile 9 mål.

– Line var fantastisk mot Nit/Hak, Thiet var verkeleg i støtet mot Nordstrand. Mot Nit/Hak gjekk vi i føringa etter 12 minutt spel, i andre omgang var vi oppe i 16-22-leiing på det meste.

Då Nit/Hak la om til spelar for spelar-markering på slutten, fekk dei Os til å stressa. Os kom seg likevel til avslutting, men missa, og fekk tre raske mål imot i sluttminutta. Det nest siste som skjedde var at vertane kom eitt mål bak samtidig som Os fekk éin utvist.

– Heldigvis skåra vi på det siste angrepet, og fekk oss ein velfortent tomålssiger, fortel Gitte om den dramatiske innspurten.

Os sin neste kamp går heime mot Rælingen 2 på søndag.

• Terminliste og tabell på handball.no