Sette seg bak rattet mens kameraten urinerte

Ein mann i 40-åra frå Os er dømt for to tilfelle av kjøring i rusa tilstand.

I desember 2012 blei han i ein nabokommune av Os tatt då politiet rykte ut grunna melding om husbråk. Tiltalte forklarte at han berre sat i bilen og lytta til musikk, men politiet som var på staden såg at han rygga éin meter og kjørte fram igjen.

Retten festa lit til politiet si forklaring.

I juni 2013 var det ein ny kjøretur i rusa tilstand. Då sette han seg bak rattet mens kameraten, som var sjåfør, hadde stoppa bilen for å urinera.

Turen gjekk nokre hundre meter før tiltalte kjørte inn i ein parkert bil og ut på eit jorde.

Ved begge tilfella var tiltalte påverka av tablettar og hasj, ved siste tilfellet også av alkohol.

Tar kurs - slepp unna fengsel

Tiltalte møtte i Nordhordland tingrett og erkjente delvis skyld.

Han er tidlegare dømt seks gongar for ulike lovbrot, blant dei er tre tilfelle av kjøring i rusa tilstand.

Osingen blei dømt til 50 dagar fengsel, men soning blir utsett på vilkår mot at han fullfører eit program mot ruspåverka kjøring,

Han fekk også ei bot på 10.000 kroner og må venta fire år før han tar førarkort igjen.

I tiltalen var også eit punkt med to tilfelle av vald mot tidlegare sambuar, i oktober 2012 og februar 2013, men tiltalte blei frikjent for begge.