– Skal vera liten og lokal

Sommarens ølfestival på Oseana blei ein suksess, godt hjulpen av det fine vêret.

– Det at vi flytta festivalen ut på terrassen trur eg folk satte veldig stor pris på. Tilbakemeldingane frå bryggeria av også særs gode. Dei hadde ikkje vore på ein festival med ei slik utsikt før og fleire av dei sa då dei reiste «Vi kjem tilbake neste år». Vi arrangerte jo festivalen på verdas finaste plass og er nok den einaste som ligg heilt nede i sjøkanten med utsikt til ein isbre, smiler Veronica Søilen Halhjem, markeds- og kommunikasjonsansvarleg.

Stemninga ute på terrassen var utvilsomt god og folk koste seg i sola.

– Eg trur det blei ein veldig fin oppleving for dei 300-400 som var innom i løpet av dagen. Vi skulle gjerne ha vore fleire. Det er noko vi skal jobba hardt med fram mot festivalen til neste år, som vi allereie har sagt skal vera 22. juni.

Liten og lokal

På årets festival stilte Bjørnafjorden Bryggeri, Lysefjorden Mikrobryggeri, Ekangersmuget, Haandbryggeriet, Håndbryggeriet En Liten Øl, Kinn, 7Fjell og Mjøderiet.

– Det er ikkje sikkert at vi skal ha fleire bryggerier enn dette. Vi har i tillegg til å setta datoen diskutert med våre vener og medarrangørar i Bjørnafjorden Bryggeri kva slag festival vi vil vera.

– Konklusjonen er at vi skal vera ein liten og lokal ølfestival med bryggerier som serverar spennande smaker. Oppgåva no blir korleis gjera dette til ei oppleving som alle vil ha med seg, seier Halhjem.

Skal styrka profilen

Kva bryggeri som blir invitert, og som stiller, neste år er langt frå klart.

– Vi ønskjer å ha med oss bryggeri som styrkjer denne profilen. I tillegg har vi diskutert at vi ønskjer ei meiroppleving med same profil. No er det for tidleg å seie kva det blir, men det kan handle om mat, underhaldning eller musikk. Vi erfarte i år at desse tinga er noko vi må ta tak i for å løfta oss vidare.

– Kva om vêret ikkje blir like bra som i år?

– Då må vi ha ein plan B klar. Blir det dårleg vêr må vi innsjå at vi kanskje må vera inne i Oseanasalen, men vi skal likevel sørgje for å gje den same gode opplevinga som folk fekk i år. Vi har heldigvis eitt år på oss til å planlegga dette, avsluttar Halhjem.