Skaper dårleg omdømme

Bildeserie:

1 av 1

- Det er ikkje første gong vi finn slikt søl i fjorden. Anten har ikkje oppdrettarane gode nok rutiner eller utstyr, eller så har dei ikkje gode nok haldningar. Eg fryktar at det siste er tilfelle, seier brannsjef Stein Gjøsund til midtsiden.no.

- Daud fisk blir samla på tankar, der dei set maursyre til. Dette skal leverast som spesialavfall, men både i fjor sommar, i vinter og no også denne sommaren så gjer vi observasjonar av slikt griseri.

Ikkje farleg
I førre veke var brannvesenet på fjorden med andre frå kommunen for å ta vassprøvar. I dag kom resultatet frå Chemlab Services AS i Bergen.

- Analysen viser null E.coli og 20/100 ml koliforme bakteriar. Eg fekk opplyst at alt under 100/100 ml blir rekna som godt nok badevatn, men eg trur ikkje det er stas å bada i dette avfallet likevel, seier Gjøsund.

Må melda frå
Analysen fortel ikkje kva avfallet er, og adressa er naturlegvis framleis ukjent.

- Men det ser likt ut som det vi fann etter at eit oppdrettsanlegg meldte frå om eit uheldig utslepp i fjor, og stammar nok frå same bransje, seier brannsjefen.

- Sjølv om vi har sett fleire slike utslepp har det berre hendt éin gong at nokon har meldt frå, og då gjorde dei det tre veker etter at uhellet hadde skjedd. Oppdrettarane må melda frå ved slike uhell så snart som mogleg, og helst jobba hardt for å unngå dei. Det er deira eige omdømme som står på spel, åtvarar Gjøsund.