Skreddarsydd song til overnaturleg jubileum

Fredag kveld viser elevar ved Bjørnafjorden kulturskule framsyninga «Nils Klim – Ei musikalsk reise».

– Denne var tiltenkt jubileumsåret 2019-2020. Vi la planane før samanslåinga av Fusa og Os for åra Fusa kulturskule fylde 25 år og Os kulturskule fylde 40 år, seier lærar Turid Moberg Kirkbride.

Turid har vore lærar ved Os, og seinare Bjørnafjorden kulturskule, i 20 år.

Ho har også vore aktiv songar i Edvard Grieg Vokalensemble, der ho har blitt kjent med den engelske komponisten Tyrone Landau.

– Landau skriv fast for Edvard Grieg Korene. Han er heilt fantastisk dyktig og rask, du kan be om eit stykke til eit instrument så ligg det i innboksen din neste morgon, skryter Moberg Kirkbride.

Han har laga «Nils Klim – Ei musikalsk reise» eksklusivt til Bjørnafjorden kulturskule.

– Eg er så glad for at vi endeleg får framføra dette! Vi hadde øvd mykje til framsyninga som skulle vera i mai 2020, og blei veldig lei oss då pandemien førte til full stopp.

– Sidan 2020 har vi fått fleire nye elevar, som no har fått øva på det same. Og noko av koreografien er brukt av kollegaen min, Patricia Langeland, som fann nokre oasar av opningar for danseframsyning i løpet av pandemien.

– Eg er også glad for at vi likevel har med oss både dansarar og Patricia til å leia produksjonen, det er ho så god på.

Til den noko tilpassa versjonen av den skreddarsydde framsyninga er det både musikantar, songarar og dansarar, i alt rundt 50 elevar.

Framsyninga er inspirert av Ludvig Holberg sin roman «Nils Klims Reise til den underjordiske verden».

Dette er Holberg sin einaste roman, skriven i 1741, og sett på som den første science fiction-romanen i Norden.

I romanen har Nils Klim reist heim til Bergen frå naturvitenskapsstudie i København.

Heime i Bergen vil han studera ei hole i Fløyen, for å imponera andre vitskapsmenn, og ramlar ned i hola til ei underjordisk verd, planeten Nazar, der han møter mange merkelege vesen.

Fredag kan du sjå om elevane klarer å skapa magi.