Skuffa over eigen EM-prestasjon

Noreg stilte med 8 utøvarar i junior-EM i karate i Portugal i helga.

Den einaste landslagsutøvaren frå Hordaland, Åsmund Slettevold frå Os, er skuffa etter tap i første kamp.

– Eg leia 3-0 og burde ha slått han, seier Åsmund om første motstandar, Filip Glatz frå Slovakia.

– I staden var eg litt for varsam då han prøvde å få meg i bakken, eg ville prøva å unngå fleire åtvaringar, og han fekk nokre unødvendige poeng.

Det sto 3-3 etter full tid og vinnaren blei kåra på dommaravgjerd.

– Her var eg ganske sikker på at dei fem dommarane skulle halda meg som vinnar, men sånn blei det dessverre ikkje.

Medalje i fjor, skuffa i år

I fjor blei det bronse på Åsmund i -76 kilo. I år hadde han gått opp til tungvekt, -78 kg, og der blei det med denne kampen.

– Dette var ein av dei viktigaste konkurransane mine i år, så eg er ganske skuffa, seier Åsmund.

Det var 45 nasjonar som deltok i meisterskapen. Ingen av dei andre norske presterte betre enn osingen.

I Slettevold sin klasse var det 30 deltakarar. Osingen har to år igjen som junior/U21-utøvar.

Neste meisterskap for Åsmund blir NM på heimebane, som går i Bergen 29. mars.