Slo Finland 3-1

Denne veka blir ope nordisk meisterskap i fotball for J16-landslaga spelt på Austlandet. I den første kampen i turneringa måtte Noreg sjå seg slått 0-1 av Nederland.

Onsdag var det tid for revansje då Noreg møtte Finland, som tapte 2-5 for Danmark i opningskampen, på Ottestad stadion.

Som i den første kampen starta Lysefjordenjenta Madelen Koldal Holme på det norske laget. Ho blei i onsdagens kamp bytta ut etter 41 minutt.

Blei pressa

Noreg tok tidleg føringa og gjekk opp i 1-0 etter berre 13 minutt. 2-0 kom etter ein corner berre minuttet ut i andre omgang. Sigersmålet 3-1 blei sett inn på overtid.

– Vi blei imponert over Finland då vi studerte dei før kampen, det er mange element som er bra i spelet deira og vi var veldig spent på om vi klarte å finna mottrekk. Vi hadde ein plan og det fungerte bra. Dei største problema skapte vi for oss sjølv då vi gav bort nokre cornarar og dødballar, ellers spelte vi ein veldig god førsteomgang der vi fann dei romma vi skulle finne og hadde mykje interessant foran mål, seier landslagstrenar Børje Sørensen til fotball.no https://www.fotball.no/landslag/norge-jenter-16/2018/j16-norsk-jubel-pa-ottestad/

Skal tørre å prøve

Andreomgangen er han ikkje like nøgd med, mellomanna blei Noreg spelt lavt og Finland skapte fleire gode sjanser. Samstundes meiner han det er mykje positivt å ta med seg frå kampen.

– Dette er ein fin gjeng med fotballspelarar. Ein 16-åring gjer ikkje alt rett i løpet av ein kamp, men for oss handlar det om at vi skal beherske at det blir litt trangt når vi møter lag på det øvste nivået. Då får vi ikkje dei same romma som vi har fått i andre kampar vi har spelt. For å kome dit må vi tørre å gjera feil, seier landslagstrenaren.

Fleire hundre tilskodarar hadde tatt turen til Ottestad for å få med seg kampen.

Noreg møter Danmark i den siste innleiande kampen fredag.