Slutt for dyrlegevakta

Bergen kommune sa frå i dag av opp avtalen dei hadde med ni dyreklinikkar i Bergensområdet om å driva døgnbasert vaktordning for smådyr. Ein av klinikkane som har vore med i samarbeidet er Osøyro Dyreklinikk. Tilbodet har omfatta kommunane Bergen, Os, Sund, Fjell, Øygarden, Askøy.

– Vi er frykteleg lei oss for at Bergen kommune har vald å avslutta avtalen, ikkje minst for kundane og alle dyra som vil bli råka.

– Dette er ei ordning som har rusla og gått i allefall dei siste 20 åra, fortel veterinær Eva-Kristin Lunde på Osøyro Dyreklinikk.

Var spent

Lunde, som starta klinikken i 1995, fortel at ho og kollegane i på dei åtte andre dyreklinikkane har sett problemstillinga komma.

– Vi har jobba i mange månader for å få til ei løysing med kommunen.

– Difor var eg veldig spent då eg reiste på møtet med dei andre i går, men det var altså ikkje råd å få det til.

– Politikarane har tydelegvis bestemt seg for at marknaden skal rå og det skal få styra seg sjølv.

Ikkje økonomi til døgnvakt

Osøyro Dyreklinikk har tre veterinærar og fem dyrepleiarar/assistenter tilsett. Dei vekene klinikken har hatt vakt har ein veterinær og ein dyrepleiar hatt hovudvakt, medan dei andre har vore i bakvakt ved behov.

– Konsekvensen er at vaktordninga no bli kutta er at vi ikkje kan halde ope på kveld og i helgene.

– Vi er ikkje store nok til å klare å handtera natt og helg i Os aleine, det er ikkje gjennomførbart verken økonomisk eller menneskeleg.

– Eg kan ikkje pålegga dei tilsette å skulle jobba natt og helg på dugnad, seier Lunde.

Kommunen vil sjå på saka

Ordninga, kor dei ni klinikkane har bytta på å ha vakt frå klokka 16-08 på kvardager og heile døgnet i helgene, har vore delfinansiert av tilskotet frå Bergen kommune og har vore eit middel for å oppfylla kommunane si lovpålagte plikt. Etter dyrehelselova §3a skal kommunane sørga for tilfredsstillande tilgang på tenester frå dyrehelsepersonell og organisera ein klinisk veterinærvakt utanom ordinær arbeidstid.

Fram til no er det Bergen kommune som har tatt rekninga for vakttenesta på vegne av kommunane som har nytt godt av den. Os kommune har soleis ikkje betalt for tenesta.

– Kva vil Os kommune no gjera for å sikra fortsatt veterærvakt?

– Vi må setta saka på dagsorden og sjå kva ansvar og moglegheiter som ligg der.

– Om dette er eit lovmessig krav slik du refererer, så kan ikkje Bergen heller berre kvitta seg med ansvaret.

– Eg vil setta nokon til å sjå nærare på saka på ledermøtet måndag, seier ordførar Terje Søviknes (Frp).