Søkjer ny leiarstilling i Kvam

Hausten 2013 gjekk Terje Sperrevik frå stillinga som politioverbetjent ved Os lensmannskontor til midlertidig stilling som lensmann i Samnanger og Kvam.

• Les òg: Til Kvam etter 24 år på Os

Stillinga blei utvida år etter år, mens politiet har vore gjennom ei stor omorganisering, men 1. mars 2018 er det slutt.

– Det er oppretta ny stilling, lensmann for området Kvam, Samnanger, Fusa og Tysnes, med søknadsfrist 2. januar. Søknaden min er på veg, seier lensmann Terje Sperrevik.

Om han ikkje får jobben er han tilbake til Os lensmannskontor som straffesaksansvarleg for Os og Austevoll.

Stengde kontoret i Samnanger

Sperrevik fortel om ei lærerik og kjekk tid på kontora i Samnanger og Kvam.

Onsdag hadde han siste dag ved kontoret i Samnanger, som frå 1. januar er lagt ned.

• Les òg: 120 lensmannskontor fjerna (NRK)

– Kontoret i Samnanger har vore ope to dagar i veka. Vi får tilbakemeldingar om at folk synest dette er vemodig og trist, og det går an å forstå, synest Sperrevik.

3-4 tilsette i politiet har sete i Samnanger desse to dagane, dei andre dagane har dei vore på lensmannskontoret i Norheimsund, som òg blir base for nytt område for Kvam, Samnanger, Fusa og Tysnes.

Vil bli meir synleg

Målet med nærpolitireformen er at politiet skal bli endå meir synlege og tilgjengelege.

– Å ha eit fast kontor og eit skilt på veggen er òg ein måte å vera synleg på, så eg forstår at folk synest det er vemodig når det fysiske lensmannskontoret forsvinn. Det er litt som med Posten, banken og Nav.

– Men vi skal bli synlege på andre måtar. Det handlar om både patruljering og proaktivt arbeid, som kontakt med skule, næringsliv og kommune. Dette er arbeid eg liker, og som eg trur vi skal få til.

Om han får den nye lensmannsstillinga ser han fram til å laga ein ny organisasjon.

– Eg kjenner godt kollegaene mine også på Tysnes og i Fusa, og det er mange flinke medarbeidarar ved desse kontora, seier Terje Sperrevik, som får ein spennande start på 2018.