Sporty søndagssyssel i strålande vintervêr

Bildeserie:

1 av 3

Fredag kom det påfyll av snø, laurdag og søndag har vi hatt skyfri himmel, minusgradar og nydeleg vintervêr i Os.

– Eg har ikkje gått på ski på Ulven sidan eg gjekk på ungdomsskulen, seier Oddgeir Bjelland.

– Men vi er glade i skiturar, kona litt ivrigare enn meg, og i dag fann vi ut at vi ville gå ein tur i heimbygda, seier han på vegne av seg sjølv og Johanna.

Dei var ikkje åleine om å gå tur på og ved flystripa på Ulvenvatnet i dag. På skøytevatn i Os var det òg høg aktivitet, ikkje minst på sentrumsnære og lett tilgjengelege Banktjørn.

Meir vinter - meir snø

Vinteren skal halda seg i fleire dagar.

Yr melder sol og minusgradar til og med torsdag, Storm melder snø heile måndag, onsdag kveld og torsdag morgon.

Temperaturen skal ligga på 3 til 5 minus.

Plussgradar og regn til helga

Både Yr og Storm melder plussgradar frå fredag og gjennom helga.

Begge spår regn fredag, laurdag og søndag, og temperatur på 3 til 7 plussgradar.

Det er med andre ord berre til å koma seg ut døra om ettermiddagane om du vil bruka skøytene dine mest mogleg før isen blir utrygg.

Fleire trygge vatn i morgon?

Os brannvesen, som nyleg fekk ansvar å måla isen på fleire vatn i Os, hadde førre måling fredag klokka 14.

Sånn var resultatet:
Vindalsvatnet. Ikkje farbar.
Gåsakilen. Ok
Banktjørno. Ok
Ulvenvatnet. Sørenden ok, nord for brua ikkje farbar.
Tveitavatnet. Ikkje farbar
Langavatnet. Ok
Lekvenvatnet. Ikkje farbar
Strønevatnet. Ok
Bjørnavatnet. Ikkje farbar

– Vi tar nye målingar i morgon, på dei vatna som ikkje var farbare fredag, fortel vakthavande.

Då er det kanskje fleire vatn som får status som farbare etter dei tre døgna med minusgradar vi har hatt i helga.