Førarkortbeslag etter flaksande tørkestativ i tunell
Steinkasting, høg fart og tysk tullekøyring: Politiet i Os har hatt mange og svært ulike oppdrag denne helga.
I helga har politiet fått melding om både ran, bruhoppar som landa i båt og parkering av uregistrert bil i andre sin hage.
Les meir om desse i relaterte saker under.
Dei har dessutan hatt trafikkontroll, fått melding om steinkasting og tillaup til brann.
– I 20.30-tida fredag kveld var det trafikkontroll på Lyseklostervegen, fortel politioverbetjent Anne Lyssand.
Det blei skrive ut seks forenkla førelegg.
Høgaste målte fart var 73 km/t i 50-sona, noko som fører til 13.050 kroner å betala og tre prikkar på førarkortet.
Klokka 00.50 natt til laurdag blei det observert ein person som kasta stein på ein av Kiwi-butikkane i Os.
– Alarmen blei utløyst og vedkomande sprang frå staden, opplyser Lyssand, utan å nemna om saka blir følgd opp.
Laurdag fekk politiet melding om eit flaksande tørkestativ i Skogafjellstunnelen.
Det er både 80- og 100-sone i tunellen. Stativet skal ha blåst av ein annan bil eller hengar, mot meldar sin bil.
– Det blei tatt beslag i førarkortet til bilførar, ein mann i 60-åra. Han samtykka til beslag.
Søndag formiddag fekk politiet melding om ein bil som køyrde vinglete på Strønevegen.
– Bilen skal ha køyrd over i motsett køyrefelt og opp og ned i fart.
Politiet fann bilen og kontrollerte førar.
– Vedkomande er ein mann i midten av 20-åra, ein turist frå Tyskland. Han fekk beskjed om å skjerpa køyringa si.
Søndag kveld klokka 20.45 kom det melding om branntillaup i Oshaugen.
– Det var ingen flammar, men det kom røyk frå ein tørketrommel. Brannvesenet rykte ut. Dei fortel at det var eit branntillaup, men at dei raskt fekk kontroll.
