Sterk 17. maifeiring i Polen

Årets EM, European Armwrestling Championship 2012, blir arrangert i den polske store kystbyen Gdansk.

Meisterskapen blir arrangert frå 13. til 20. mai og 7 av dei 17 norske brytarane som deltar kjem frå Noregs beste klubb; Os Håndbakklubb.

– Vi ser fram til dette, men det blir tøft. Med EM i Aust-Europa kjem det alltid ekstra mange sterke utøvarar, seier Arne Thuen.

Går for gull

I fjor droppa osingane EM, dei sparte kreftene og pengane til VM i Las Vegas i USA, der juniorutøvar Andreas Fagerthun sine 5. og 6. plassar blei beste plasseringar.

Året før, i 2010, sto Arne Thuen for beste resultat med to sølv.

– Eg deltok i to klassar, master og grand master, og det blei for tøft. Fleire av kampane gjekk rett etter kvarandre, så det blei lite pause og eg var heilt tom då eg kom til finalane.

– Det vil eg ikkje risikera i år, så no blir det éin klasse, grand master (over 50 år) og gull som mål.

Ned og opp i vekt

Ronny Risøen, som i mars tok gull med begge nevar i det internasjonale stemnet Powerarm i Skien, har fått meirsmak på å gå ned i vektklassar.

– Det er ikkje lenge sidan han gjekk i 100-kilosklassen, i Powerarm gjekk han i -85 og i EM vil han delta i 80 eller 75 kg, fortel Thuen.

Asle, som også tok to gull i Powerarm, kan legga på seg to kilo og likevel klara -100 kilo-innveginga i EM.

Deltakakar og klasse

Her er deltakarane frå Os Håndbakklubb:

Asle Kvamsdal -100 kg
Are Strønen -90 kg
Øyvind Birkeland -90 kg master (+ 40 år)
Arne Thuen -90 kg grand master (+ 50 år)
Frode Veim Haugland -85 kg
Tore Matre -85 kg
Ronny Risøen -80 eller -75 kg

Frode vann ny armkrig

Medan Tore og Asle var i Powerarm i Skien i mars har Frode fått fersk oppkjøring med proffbryting i Arm Wars i tyske Düsseldorf.

– Eg møtte Martin Zonga frå Sveits, og vann 6-0 med høgre før vi sleit oss heilt ut med 3-3 med venstre. Vi braut i 58 minutt i strekk med venstre arm og eg kjenner det framleis, fortel Frode om den harde kampen mot Zonga frå vektklassen over.

Neste Arm Wars er i London første helga i juni. Då skal også Ronny Risøen vera med.

Årets største mål er VM i Brasil i september.

Midtsiden samleside: Handbak