– Sterkt prega av ulykka

Bildeserie:

1 av 5

Fredag klokka 9 blei det varsla om trafikkulykke på E39 Byvegen ved Hetleflåten i Os.

– Det er ei alvorleg ulykke. Bilførar er fastklemt og bevisslaus, fortalte politiet klokka 09.15.

Vedkomande var åleine i bilen, og blei frigjort klokka 09.23. Gjenoppliving blei forsøkt, men bilførar blei klokka 09.37 erklært død av lege på staden.

– Vi kan førebels ikkje seia noko om kjønn eller alder på den omkomne, fortel innsatsleiar Casper Kaland.

Arbeidet med å varsla pårørande var klokka 10.30 ikkje ferdig.

OPPDATERT: Fredag ettermiddag opplyser politiet at den omkomne er ei kvinne i 50-åra frå Os.

– Bussjåføren er uskadd, men sterkt prega av ulykka. Det var tre passasjerar i bussen. Dei var i sjokk, men er òg uskadd.

Front mot front i 70-sona

Politiet kan førebels heller ikkje seia noko om årsaka til ulykka.

– Det var ein frontkollisjon. Vi har grunn til å tru at begge heldt fartsgrensa, men ved ein frontkollisjon i denne farten er det sterke krefter i sving.

Bussen hadde retning Os, bilen hadde retning Bergen.

Det er ikkje tatt beslag i førarkortet til bussjåføren.

Han er undersøkt av helsepersonell på staden og blir tatt vare på av busselskapet han jobbar for.

• Os kommune har sett ned eit kriseteam for involverte og pårørande

E39 er framleis stengt - trøbbel over Fanafjellet

Krimteknisk er på staden, men politiet venta i 10.30-tida framleis på ulykkesgruppa til Statens vegvesen.

E39 blir stengt forbi Hetleflåten ei stund, og Midtsiden har fått fleire meldingar om problem i trafikken både i Lysefjorden og på Fanafjellet.

Årsaka skal vera at lastebilar og vogntog som møtast har problem med å passera kvarandre.

OPPDATERT: E39 opna igjen klokka 12.45.