Stiller smerte med lyd

I fjor var det 25 år sidan Anne-Mette starta helseklinikk i Os. Fotsoneterapi har alltid vore hennar viktigaste behandlingsform, men lydbølgjer frå hennar nyaste investering, eit CellSonic-apparat, har vist seg å vera ekstra effektivt mot smerter.

– Eg tar vare på meg sjølv på mange måtar, med sunn mat og trening, men av og til er det ikkje nok med ein fjelltur for å få smertene til å forsvinna, då må eg til Anne-Mette med ryggen min, seier Tor Bjørnevoll.

Flytta 30 tonn om dagen
Kroppen til Tor har tålt mykje, 40 år som murar sett sitt preg på musklar og skjelett. No har han pensjonert seg, men det er ikkje lenge sidan han flytta 25 til 30 tonn om dagen.

– Ei lang yrkeskarriere som murar har tatt på. I dag held eg meg i grei form, men eg har nokre skadar i rygg og hofte.

Sunn livsstil med godt kosthald og ein til to fjellturar i veka hjelper på.

– Når eg stivnar til plar det hjelpa med ein fjelltur, men av og til løyser det seg ikkje ved å gå.

Då får han god hjelp av lydbølgjene til Anne-Mette.

Investerer framleis
Etter fleire år med klinikk på AMFI Os er Anne-Mette tilbake der ho starta, i kjellaren i bustaden hennar i Stegen. I ein periode der ho sjølv var sjukmeldt måtte ho seia opp lokalet i Amfisenteret, no trivst ho med å ha heimen som arbeidsplass.

– Med eigen inngang og god plass fungerer det fint. Men sjølv om eg har trappa litt ned klarar eg ikkje å unngå å fornya utstyrsparken, seier Isaksen.

Løyser opp
Hennar faste leverandør i Sveits hadde eit spennande, nytt apparat å by på, og Anne-Mette slo til.

–CellSonix-apparatet består av ei datamaskin og eit behandlingshovude. Maskina avgjer sokalla PP-lydbølgjer (peak point) til vevet, og desse viser seg å vera effektive til å løysa opp kroniske indikasjonar, som kalkavleiringar i ledd eller senar.

– I tillegg brukar eg Newlight Laser, laserlys (ikkje UV) som er veldig stimulerande. Behandlinga startar gjerne med dette apparatet før eg går over til lydbølgjer, seier ho.

Gløymer ikkje det gamle
Sjølv om ho har investert i dyre apparat som kan gje raske resultat når det gjeld smerter, er Anne-Mette opptatt av å inkludera andre behandlingsformer.

– Erfaring og kunnskap, å sjå på livsstilen til klienten, er viktig. Med vegleiing saman med behandling kan klientane mine gradvis endra livsstilen sin slik at dei sjølv er med på å ta vare på kroppen sin.

– Hjartebarnet mitt er framleis fotsoneterapi, ein urgamal behandlingsform som er viktigare no enn nokosinne, seier Anne-Mette Isaksen.