Stjerneavslutning
Høg stemning og stor jubel då Stjerneserien avslutta sesongen med bankett i restauranten på Oseana laurdag.
Bildeserie:
Stjerneserien - fotballserien for funksjonshemma, feira ein strålande sesong med avslutningsbankett i restauranten i Oseana laurdag kveld.
– Vi er omlag 160 spelarar, trenarar, ledsagarar og foreldre med i kveld, fortalde Kristine Bjånesøy Tikkanen, frå Søre Neset IL, som var arrangørar for banketten.
Til å dela ut hedersbevisningane hadde Tikkanen fått med seg ordfører Terje Søviknes, noko som bidrog med ei ekstra stasleg ramme.
– Vi er veldig takknemlige for at ordføraren tek seg tid ein laurdagskveld til å gjera dette.
– Det betyr veldig mykje for spelarane, smilte Tikkanen.
Juble og lagbilete
Eitt og eitt lag blei ropt opp i amfiet frå foajeen til restauranten for å helsa på ordføraren og få sitt personlege trofè. Og sjølvsagt ta eit lagbilete saman med prisutdelaren.
– Vi er 10 klubber i serien som spelar tre runder på våren og tre på hausten.
– I kvar runde speler vi to kampar, med høg innsats og vinnervilje.
– Vi førar ikkje tabell, så difor denna avslutninga kor alle blir heidra.
Kamprundane blir arrangert på rundgang av dei 10 klubbane, Askøy, Nest-Sotra, Voss, NBK, Tertnes, Djerv, Søre Neset, Fana, Brann og FK Fyllingsdalen.
I tillegg til seriespelet deltok fleire av laga på landsturneringa i Stjørdal i haust og på treningsleir i Portugal på våren.