Osbadet arrangerer intensivkurs i svømming før ferien. (Ill. foto: Kjetil Vasby Bruarøy)

Stor interesse for intensivkurs før ferien

28 av 30 plassar er tatt: Dei to neste vekene får ungar siste finpuss på svømmeteknikken før ferien.

Av: Kjetil Vasby Bruarøy

Mens dei som sel bensin, øl eller is opplever gode tider i det strålande sommarvêret, har Osbadet naturlegvis hatt ein roleg mai og start på juni.

– Skulebading, svømmeklubb og mosjonistar har skapt aktivitet, det er i helgene vi har merka best at det har vore roleg her, seier dagleg leiar Torbjørg Brattabø.

– Vêret kan vi ikkje gjera noko med, vi gler oss på vegne av alle som koser seg utandørs, og tenkjer at timinga ikkje var så verst med tanke på at vi no er i innspurten på byggearbeidet med ny dobbelthall.

Dei to neste vekene blir det uansett auka aktivitet på ettermiddagane, måndag, onsdag og torsdag to veker på rad skal 30 ungar mellom 6 og 12 år intensivkurs i svømming.

– Dette er nye kurs i vår regi, og responsen var veldig god. Vi køyrer 10 deltakarar og 2 instruktørar per kurs, no har vi sett opp tre kurs og 28 av 30 plassar er booka.

Tryggare i vatnet før ferien

Os Svømmeklubb har hatt tilsvarande kurs tidlegare, sponsa av Gjensidige. Etter at sponsinga tok slutt blei det eit vakum.

– Vi har sett, både på desse kursa og på eit kurs vi køyrde for unge innvandrarar i vinterferien, at interessa er stor.

Fleire av dei yngste har frå før hatt vasstilvenning i barnehagen, andre har hatt svømmeundervising i skulen. Likevel kan det ifølgje Brattabø vera mykje å henta ved å ta eit kurs.

– På kurset vi hadde med nye landsmenn i vinterferien, som var med ungar som gjerne var for gamle til at skuleklassen deira i Os hadde svømming, såg vi at framgangen var stor. 

Deltakarane skal delast i grupper etter nivå.

– Det er noko eige med å få opplæring i små grupper, og til saman seks økter på to veker. Eg trur mange av desse deltakarane vil bli langt tryggare i vatn, og ha større glede av bading gjennom ferien.

Fleire saker