Ein av dei største til no: Har laga topp 10-liste

Der er ein knapp månad igjen av årets sesong i Oselvo, og Ole Vidar Søviknes, som oppdaterer med fangst for fangst på prohd.no, har laga ei topp 10-liste over dei største fangstane til no.

Dei tre største laksane som er tatt kom på land frå 19. til 22. juli:

1. Thore Mykkeltvedt - Laks 9.2 kg - Tøsdalvatnet 19. juli
2. Johnny Lund - Laks 7.5 kg - 95 cm - Lundetræ 21. juli
3. Johnny Lund - Laks 7.0 kg - Lundetræ 22. juli

Sjå heile lista, med bilde av fiskane, på prohd.no.

– Det er ingen over 10 kilo til no, men samtidig er alt over 5 kilo omtrent for stor fisk å rekna i Oselvo, seier leiar for grunneigarlaget Roald Helle.

Han er sjølv på 6. plass med ein laks på 6,5 kilo.

– Remi er under meg, Johnny er over. Alt er i grunnen som det skal vera med den lista, seier Roald, vel vitande om at han kjem til å skapa noko temperatur langs elvebreidden i innspurten på sesongen.

– Sant skal seiast, Remi har hatt ein god sesong, og har fleire laks i fryseren. Det er det dessverre ikkje alle som har, for sesongen har vore under middels i mengde fangst.

I starten var det nok vatn, men nordavind i 10 gradar. Så kom varmen.

– Då det endeleg kom ein regnskyll litt ut i juli, var det 24 gradar i elva. Laksen bit ikkje mykje når det er så varmt.

Sjølv sto Roald i sone 2 og såg 30-40 laks svømma forbi og gå opp fossen, utan at han fekk eit einaste napp.

– Men no er det ganske stabilt i elva. Vi som fiskar håper på ein eller to skikkelege nedbrsperiodar no før sesongen er over. Det står laks i heile elva, så det er framleis sjanse til å ta både mykje og stor fisk.

Sesongen varer til og med onsdag 30. august.

– Kva med pukkellaks, som har blitt eit aukande problem, særleg i Nord-Norge?

– Vi har tatt tre og observert tre-fire. Det som er nytt i år er at den er tatt heilt oppe i sone 5. Før var det frå sone 2 og nedover, og vi trudde og håpa at den ikkje kom seg forbi fossen.

Pukkellaks er uønskt art frå Russland. Den skal vera god å eta, men ikkje etter eit par dagar i elva. Den byrjar nemleg å dø når den svømmer inn i elva, og omkommer når den har gytt, noko som har gitt den tilnamnet zombie-laks.

– Den eine eg fekk gav eg til katten. Han snudde ryggen til etter å ha snusa på den.