- Surt å tapa

Laurdag kjempa Åsne Takle Eide og resten av Arna-Bjørnar om bronse i serien. Men Kolbotn skåra dei einaste måla i kampen og Arna-Bjørnar reiste skuffa heim til Vestlandet.

- Det blei nesten både i cupen og serien, det er litt surt. Spesielt sidan vi var i storslag førre helg. Vi hadde nullstilt oss før den avgjerande serieavslutninga, men var veldig tent og klar for siger, seier Åsne til Midtsiden.no.

Spelte 60 minutt
Osingen spelte frå start og rundt 60 minutt av kampen. Sjølv er ho ikkje heilt nøgd med eigen innsats.

- Banen var tung og vanskeleg å spela på, og det blei pasningar som ikkje var heilt gode.

Kontrakt ut året
Då Åsne gjekk frå Os til Arna-Bjørnar i vår fekk ho kontrakt ut året.

- Før jul skal eg snakka med dei om vidare kontrakt, og eg håper på ny avtale, gjerne ein lengre ein, for eg trivst godt i klubben

Topp på toppidrettsgymnas
I haust starta Åsne på Tertnes Toppidrettsgymnas. Der går ho i klasse med to ho var på krinslaget med, men som speler på Sandviken.

- Men vi speler ofte med dei frå andre klassetrinn, så då treff eg også lagvenninner frå Arna-Bjørnar, fortel ho.

Landslagssamling over nyttår
No blir det ei veke ferie før årets tre siste treningsveker med Arna-Bjørnar. Etter nyttår ventar oppkjøring til ny sesong, om ho får kontrakt vidare, og kanskje ein ny runde med landslaget.

Åsne blei tatt inn på jenter 16-landslaget i sommar og har spelt 9 landskampar til no.

- Blir det fleire samlingar eller kampar med desse i nær framtid?

- Det skal vera ei samling i februar, så eg håper eg blir invitert med der, seier Åsne Takle Eide.