Sveise-elevar på synfaring

Bildeserie:

1 av 9

Elevane ved TIP 1- B ved Os vidaregåande skule møtte tysdag opp på Halhjem kai for å få skyss over til Ramsholmen, ein holme som ligg nokre hundre meter frå ferjekaien.

- Vi har sidan i haust arbeida med å bygga ei brygge for Os Rotary Klubb som før påske blei montert på Ramsholmen, så no skal vi ut og feira litt, fortel lærar Magnus Bertil Milde.

Eigenkonstruert båt

Det blei ein flott dag for elevane. Med nydeleg vêr, grillmat og fisking, nytte elevane dagen på holmen.

Skyssbåten dei blei frakta med er ein "one of a kind" rib, konstruert av Os Rotary og laga av Unik Filtersystem AS.

- Båten er universal og med rampe som gjer at vi kan frakta rullestolbrukarar ut til holmen.

Motoren er kjøpt i spleiselag med Os Brannvesen som òg nyttar båten til sitt bruk.

Jobba kveldar og helg

I samarbeid med Bergen og Omegn Friluftsråd (BOF) har Os Rotary Klubb i fleire år jobba dugnad for å få området på Ramsholmen tilrettelagt, spesielt for rullestolbrukarar.

- Prosjektleiar Øystein Moberg har verkeleg stått i bresjen for å få området ferdig, fortel Leo Corneliussen frå Os Rotary Klubb.

Då dei fekk stål i gåve frå Aker Sollutions kontakta dei skulen for å høyra om dei var interessert i å laga ei brygge.

- Stålet skulle brukast som kjøkkenrampe på Visund-plattforma, men blei ikkje brukt likevel, så vi var så heldig å få det.

Elevane har jobba sidan i haust og mange timar har gått med til arbeidet.

- Det gjekk fint, men det var utfordrande og vi har jobba både kveldar og helg for å få det ferdig, fortel TIP- elev Joakim.

- Men det var kjekt, vi lærte mykje og kunne godt ha gjort det igjen.

Sa ja - fekk angst

Då Milde fekk høyra om oppdraget sa han ja med éin gong.

- Eg sa ja før eg hadde sett teikningane på brygga. Då teikningane kom fekk eg litt angst, seier han og ler.

- Oppdraget var nok i største laget, men det ordna seg til slutt og elevane gjorde ein god jobb.

- Vi fekk gode teikningar som vi kunne stola på, så sidan i haust har vi planlagd, kappa og sveist.

- Dette stålet er ikkje det lettaste å jobbe med, så dei har gjort ein veldig god jobb, seier Corneliussen nøgd.

Blei større og større

Prosjektet på Ramsholmen har vore eit langdrygt prosjekt som har vart gjennom fleire år.

- Det starta då vi fekk kjøpt eigedomen med føresetnaden om at området skulle bli etablert for ungdom, ålmenta og for rørslehemma.

I fleire år har Os Rotary samla midler, jobba dugnad og etterkvart blei planane større og større.

- Då BOF kjøpte tomta av oss fekk vi inn ny kapital til å lage sjøhus med møterom, toalett og ein base for BOF i underetasjen.

BOF mangla eit depot i området og no fekk dei ein plass å ha båtar, kajakkar og liknande til utleige.

Ramsholmen for alle

30. juni er datoen då sjøhuset skal stå ferdig, men Os Rotary leiger allereie ut området til lag og organisasjonar.

Båthus, kai, bodar, toalett, rullestolvennleg veg og ramper er noko den ivrige gjengen har fått laga, alt på dugnad og velvilje frå ulike bedriftar og privatpersonar.

- Velvilja har vore stor, vi har blant anna fått god hjelp frå Bjørn Døsen, Os kommune Jamax, og i 2 år no har vi vore 8 personar som har arbeida dugnad to gonger i veka, året rundt.

- No ønskjer vi at alle skal kunne bruka plassen vår på Ramsholmen, både lag, organisasjonar, bedriftar og private kan ta kontakt for å få leiga området.

Og det ikkje utleigd så er det fritt fram for folk å legga båten sin til her og nyta dagen.