Til USA for å venta

I dag, på fristen, reiste Steffen Riley ut av Noreg. Han er fødd i Noreg, døypt i Noreg og har vore her så mykje han kan etter at foreldra skilte seg då han var to år gamal, men fekk likevel avslag på søknaden om opphaldsløyve.

Les òg:
Må ut av Noreg innan 17. februar
– Ikkje ei enkel sak

– Eg er glad eg fekk koma heim så eg fekk kjørt han til Flesland, seier pappa Lawrence.

I dag var han i banken på Os på veg til flyplassen for å ta ut nokre dollar som Steffen har til dei første dagane i USA. Reisa gjekk via København og Chicago til Indianapolis.

Der skal Steffen bu hos ein kamerat, i småbyen Peru nord for Indianapolis, til han får seg ein jobb og sin eigen plass å bu mens han ventar på svar på klagen han sendte på vedtaket.

Pappa fekk krav om norskkurs

Saka kunne sett annleis ut. Pappa Lawrence har heilnorsk mor og har budd i Øyane i Os sidan han var tre år gamal. Men han er fødd i USA og har amerikansk statsborgarskap, som den amerikanske mora til Steffen også har.

– Angrar du på at ikkje du sjølv har skaffa deg papir på at du er norsk?

– Eg vurderte det for nokre år sidan, men på lensmannskontoret fekk eg beskjed om at eg i så fall måtte ta eit norskkurs på 200 timar, seier Lawrence, med ein fortvilt latter.

– Eg har jo aldri kunna noko anna enn norsk, skulle tru 10 år i norsk grunnskule var nok.

Det blei aldri noko norsk pass på Lawrence, noko som ville gjort det lettare for sonen å få bli i Noreg.

Ingen kan blanda seg i saka

Midtsiden har prøvd å fåjustisminister Anundsen i tale, men måtte nøya oss med dette svaret frå kommunikasjonsrågjevar Andreas Skjøld-Lorange i justis- og beredskapsdepartementet:

– Det er Utlendingsdirektoratet (UDI) og Utlendingsnemnda (UNE) som avgjer saker og klager etter utlendingslova. Verken statsråden eller departementet har makt til å gripa inn i eller påverke utfallet av enkeltsaker som ikkje gjelder omsynet til grunnleggande nasjonale interesser eller utanrikspolitiske omsyn.

Då vi fortalte om saka til Steffen blei det eit enormt engasjement med mange støtteerklæringar og kommentarar om norske styresmakter.

Ordførar Terje Søviknes (Frp) har engasjert seg på Steffen sine vegne, med melding til partikollega og leiar for kommunal- og forvaltningskomiteen på Stortinget, Helge André Njåstad.

– Eg kjenner til saka gjennom Midtsiden sine oppslag og hendvendelse frå ordføraren i Os, men kan ikkje gå inn i enkeltsaker.

– Eg registrerer at klage er sendt inn til UNE og ønskjer familien Riley lykke til med behandlinga av denne. Om han ikkje får medhald, men har ønskje om å ta utdanning i Noreg, ser det ut som om det er dette ein eventuell ny søknad bør legga vekt på, framfor familiegjenforening, seier Njåstad.