– Ting vi ikkje bruker lenger

I dag opnar brukskunstmarknaden i Oseana, den populære messa som tidlegare var del av Oseanamarknaden, men som etter nytt samarbeid med Os Sentrumsforening frå i år er del av Osdagane.

Fredag følgjer Oseana opp med noko anna som er nytt; garasje- og bagasjeromsal.

– Til bagasjerom-salet har vi invitert sambygdingane til å koma og selja brukte ting frå sitt eige bagasjerom. Her er det i utgangspunktet påmeldt mange nok til at parkeringsplassen oppe på plattingen blir full, men det er mogleg at vi kan ta inn eit par til, seier Veronica Søilen Halhjem.

Ho veit ikkje kva gjestane vil selja, men har ei viss peiling på kva kollegaen Lasse Nordahl-Pedersen legg ut for sal i Oseana sitt eige garasjesal.

Frå møblar og kjøleskap til snøfres og sceneutstyr

Årsaka til at Oseana kom på å halda marknad med sal av brukt utstyr er at dei sjølv har litt på lager.

– Det har hopa seg litt opp i løpet av dei sju åra kulturhuset har vore i drift, seier Nordahl-Pedersen.

Det er nemleg ikkje gjenglømte paraplyar Oseana skal selja, men ulike varer dei sjølv har kjøpt inn, men som ikkje er i bruk lenger.

– Vi har ein nesten ubrukt snøfresar, fleire kjøleskap, ein god del møblar etter fornying av foajeen og ein del lys- og sceneutstyr.

Glas, krus, lampar og stillas står og på lista over det Oseana vil tøma frå eigen garasje.

– Vi er spente på responsen, men trur mange kan gjera ein god handel om dei finn noko dei sjølv har bruk for. Som Miljøfyrtårn synest vi det er kjekt å kunna bidra med meir enn eit stort solcellepanel, dette kan føra til god gjenbruk, seier Veronica og Lasse.