Transformasjon og urbanisering på Hauge? Ikkje utan kamp!

Bildeserie:

1 av 3

Plan- og bygningsutvalet har i ei rekkje møte i haust jobba med arealdelen til kommuneplanen. Dette inneber plassering og grensesetjing for senteravgrensing, sentrumssonar og regionssenter.

Kort oppsummert handlar dette om kvar skal vi bu i framtida, kvar skal vi handla, og kvar vi til dømes skal ha industri. Arbeidet har blitt delt opp i ulike sonar, ofte etter dei krinsane vi allereie har i kommunen.

I møtet i førre veke skulle utvalet mellom anna ta føre seg Osøyro og Kolskogen.

Administrasjonen har i forkant førebudd framlegg til vedtak, og til grunn ligg også merknadar frå grunneigarar etter at forslaga har vore ute på høyring.

Prosessen er tidkrevjande, og til torsdagens møte låg ikkje mindre enn 106 dokument som vedlegg til saka. Før utvalet tok fatt på området Os (som i denne samanhengen strekk seg heilt til Bjånes), hadde utvalet diskutert og stemt seg gjennom området Hegglandsdalen og Indregardane.

Utgangspunktet

Då utvalet skulle sjå på innspelet som foreslår å endra eigedomen knytt til Bjørnafjorden Hotell (tidlegare Bjørnefjorden Gjestetun) frå LNF (landbruksområde) til bustad vart det etterkvart stein i skoen.

Midtsiden fortalde i desember 2016 at Bjørnefjorden Gjestetun var selt, og at dei nye eigarane, BYBO AS, ville bygga bustadar på heile tomta.

I oktober fortalde Midtsiden om Josephine Våge og Iselin Borge, som saman med fleire andre tilsette hadde starta sitt eige selskap for å driva hotellet vidare. Planen var då å driva under nytt namn, Bjørnafjorden Hotell.

Dei nye drivarane har ein leigeavtale som varar i 1,5 år, men dei sa då at dei håpte på å kunne driva på i 3,5-4 år til fram til bygningane skal rivast.

Solomotstand frå Frp

Ove Frotveit (Frp) gjekk først ut og signaliserte at han ikkje ville vera med på gjera ei endring

– Området her er historisk viktig, det ligg såpass mykje historikk i området, så eg vil ikkje stemma for ei endring.

Sigrid Aanestad Bakke (KrF) meinte i sin opningskommentar det allereie var gitt nok til bustadsføremål i møtet, og her burde ein seia nei.

Terje Sperrevik (TvS) la til at han såg det som viktig å bevara næring og arbeidsplassar, og ville heller ikkje vera med på ei bruksendring.

Dette fekk kommunalsjef for samfunnsutvikling, Aina Tjosås, til å reagera kraftig:

– No må de hugsa at det allereie er signert avtale mellom Os kommune og utviklar, i dette tilfelle BYBO AS. Saka er allereie ferdig i formannskapet, og kommunestyret har sjølv sete ned ei gruppe som jobbar med saka saman med utviklar og grunneigar.

– Fleire av de som sit her i dag, sit jo sjølv i denne gruppa!

Tjosås hald fram med å vera klinkande klar på at det ikkje ville vera interessant for utviklar å vera med vidare, om plan- og bygningutvalet no valde å senda heilt nye signal.

Midtsiden har lest avtalen, som ligg offentleg ute på postlistene til Os kommune.

Her kan du lesa at i prosjektstyret sit følgjande frå Os kommune: Politikarane Gustav Bahus (Frp), Jonn Garvik (Frp), May-Britt Haringstad (H), Tryggve Lillestøl (KrF) og Harald Døsen (Ap), og frå administrasjonen; Aina Tjosås, kommunalsjef for samfunnsutvikling eller Christian Fotland, rådmann.

Dette styret er vald av kommunestyret i eit møte tidlegare i haust.

Frenetisk jakt etter fakta - med tordentale frå administrasjonen

Etter dette vart det brått eit heilt anna PBU vi var vitne til.

Administrasjonen prøvde etter beste evne å greia ut for avtalen som nyleg vart teikna mellom Os kommune og utbyggar.

Harald Døsen (Ap), som sjølv sit i gruppa som kommunestyret valde til å jobba med planane for Hauge, lurte på om dette no var hogd i stein, slik att PBU eigentleg var sjakk-matt i saka.

«Vi ønskjer å bygga bustadar på heile tomta», sa Kjetil Helland frå Bybo AS til Midtsiden i 2016.

Terje Sperrevik (TvS) var tydeleg overraska over kva som no openberra seg framfor han;

– Eg må seia at eg ikkje visste omfanget av dette. Eg føler meg lurt inn i ein retning eg ikkje vil inn i, og no er det viktig å hugsa at det ikkje er for seint å snu. Vi bør seia nei til bustadar på Hauge.

Dette fekk administrasjonen, med Tjosås i leiinga, til å kvessa ordbruken yttarlegare;

– Avtalen er vedteken i formannskapet, behandla i kommunestyret og underskriven av ordføraren. BYBO AS betaler for heile planarbeidet, og at de ikkje har lest avtalen er ikkje administrasjonen sin feil. De må ta ansvaret dykkar!

– Eg ber på vegne av administrasjonen om orsak om noko har vore uklart, men vi kan ikkje sjå korleis dette kunne vore gjort annleis.

Gruppemøte på gruppemøte

Arbeidarpartiet var først ute med å be om gruppemøte, men dei som trudde at ei løysing var i emning, skulle ta feil.

Attende kring bordet var det nok fleire som såg at med Ove Frotveit som solist frå Frp, i same ærend som opposisjonen, vart det no eit valdsamt køyr for å koma i gang med stemminga.

Utvalsleiar Gustav Bahus (Frp) sette fyr i graset då han på vegne av posisjonen ba om utsetjing av nett denne delen av planen.

– Vi meiner det vil vera hensiktsmessig å utsetja til neste møte 6. desember. Fram til det kan alle få moglegheita til å sjå nærare på detaljane i saka.

– Nei, dette vil eg gjera her og no, kom det umiddelbart frå Sperrevik (TvS). Informasjonen har vore vag, ja, men eg ser ingen grunn til utsetjing.

Sigrid Aanestad Bakke (Krf) prøvde først å gjera sjølvransaking på kvifor ho ikkje hadde fått med seg denne avtalen.

– Eg har berre lest eit gards- og bruksnummer i papira. Hadde det til dømes stått Bjørnefjorden Gjestetun eller hotell, hadde eg nok ikkje sete her så overraska som eg er no. Men no bør vi stemma, for eg ser eit fleirtal for å seia nei.

Terje Sperrevik (TvS) var på nytt på ballen og understrekte at han ville ha ei avstemming.

Så ba Ove Frotveit om eit nytt gruppemøte.

KrF opna neste runde med å minna alle på at dei framleis ville ha avstemminga ferdig no.

Trine Lindborg (Ap) kunne fortelja at ho har vore med i denne prossessen heile vegen. – Men vi har aldri nokon gang opplevd at det var eit mogleg over-og-ut for hotellet dette handla om.

Før utvalet gjekk i sitt tredje gruppemøte, og dette vart langt, nytta Tjosås høvet til på nytt å minna utvalet på konsekvensane av kva dei no sat og diskuterte;

– Dette er eit planarbeid som er sete i gang. Det er ingenting som er garantert til utbyggar, men tenk litt over kva signal de sender til utbyggar. Dette er allereie vedteke i formannskap og kommunestyre.

Snuoperasjon

Langt etter skjema var plan- og bygningsutvalet endeleg klare for å stemma.

Noko hadde tydelegvis endra seg i det siste gruppemøtet, for no gjekk posisjonen sitt forslag om å utsetja saka til neste møte gjennom med 5 mot 4 stemmer.

Neste episode av «Kva skjer på Hauge?» er i PBU 6. desember.