Oddsettarane trur Lysekloster kjem til å jubla høgst etter sesongen (foto: Andris Hamre)

Trur Lysekloster skal ta att Sotra

Lysekloster ligg seks poeng bak Sotra, men det hindrar ikkje fotballekspertar i å framleis tru på Lysekloster-opprykk.

Av: Andris Hamre

Fyllingsdalen blei for sterke for Lysekloster i siste kamp før fotballferien, men likevel trur ekspertane i NordicBet at munkane vil trekke det lengste strået i 3. divisjon avd. 4. Sjølv om det er ei luke på heile seks poeng opp til Sotra som leier serien.

– Vårsesongen til Sotra har vore eineståande, mens vi må vera ærlege og seie at Lysekloster har skuffa litt. Likevel er det ikkje så mørkt som det kanskje ser ut for dei som håper på opprykk. Det har nemleg vore mange marginar som har gått imot Lysekloster, seier Joakim Ingebrigtsen, PR-sjef for NordicBet i Noreg til Midtsiden.

Er framleis favorittar

Før sesongen var Lysekloster storfavoritt til å rykke opp til 2. divisjon, men så langt har det lugga for munkene som etter halvspelt sesong ligg på tredjeplass. Sotra har overraska og står med imponerande åtte sigre på rad. Før fotballferien blei Tertnes feid av banden med 7-1, samstundes som Lyseklostert tapte 0-2 for Fyllingsdalen. Likevel held ekspertane Lysekloster som ein knepen favoritt med 2.75 i odds. Sotra står til 2.85.

– Marginane har vore imot Lysekloster

På heimebane har Ruben Hetlevik sine menn vore uslåelege denne sesongen. Fasiten viser femten poeng og fem av fem moglege sigre på eige kunstgras, men bortebane har vore akilleshælen. Der har det blitt to sigre, ein uavgjort og tre tap.

– Våre oddssettarar trur at opprykket kan feirast i Lysefjorden etter sesongen. Sjølv om det no er ein del poeng opp til serieleiaren. Lysekloster har det beste laget i ligaen og blir vurdert til å ha ein bedre tropp enn Sotra.

– Sotra har hatt mykje stang inn, medan det har vore mykje stang ut for Lysekloster. Marginar vil alltid spele ein rolle i fotball, men vi ser ofte at det jamner seg ut over ein heil sesong. Vi trur difor at Lysekloster vil slå sterkare tilbake, medan Sotra vil få eit par smeller imot. Våre oddssettarar er truleg dei som følgjer dei lågare divisjonane i Noreg tettast, og tek sjelden feil. Om dei seier at Lysekloster rykker opp, då ender det fort med opprykksfest på Edne, avsluttar Ingebrigtsen.

Fleire saker