Trygg på cup i Øystese

Covid-19 har denne våren og sommaren sett ein solid stoppar for cupar og ulike andre arrangement som vanlegvis florerar om sommarane.

Os-laga har som tradisjon å reisa på cup til Voss, Sogndal og Norway Cup som dei største cupane. I år vart alle desse tre cupane avlyste grunna korona. Men nokre arrangørar har valt å gjennomføra sine faste sommarcupar på alternative måtar, som til dømes Øystese Eat Move Sleep cup.

– I fjor hadde vi til saman 220 lag fordelt på to helger på denne cupen. No har vi valt å dela cupen opp i tre helger, og har kring 35 lag som deltar kvar av desse helgene, seier arrangør Roger Vassnes.

Bekymringsmeldingar til kommunen

I planleggingsfasen av cupen har det ikkje berre vore enkelt. Fleire har meint at cupen ikkje burde arrangerast.

– Det har vore mykje skepsis, og vi har møtt ein del motstand. Bekymringsmeldingar har blitt sendt til kommunen, og fleire har ytra ønskje om at denne cupen skulle avlysast. Men vi har bestemt oss for å møta krava som FHI og styresmaktene har stilt, og gjennomfører cupen deretter, påpeikar Vassnes.

Avviklinga den første helga har gått over all forventning.

– I forkant av cupen har vi kommunisert godt med dei ulike klubbane i forhold til smittevern og ulike køyrereglar. Vi har til dømes hatt ei grense for kor mange vaksne som kan vera med rundt laga, og kor mange tilskodarar som kan følgja kvart lag. Dette har klubbane retta seg etter, så det har gått veldig bra.

Trygg gjennomføring

Trenar for Os jenter 2008, Hans Kristian Kvangardsnes, kunne melda om ei kjekk oppleving.

– Vi har følt oss trygge heile vegen og har hatt ei flott turnering. Vi kunne nok hatt med fleire som kunne fått vera med som tilskodarar, men eg har forståing for at arrangøren måtte vera varsam, og kommuniserte som han gjorde.

– Det vart nok ikkje den skikkelege cup-kjensla på jentene, men vi fekk spelt kampar og kost oss saman med andre aktivitetar i mellom kampane, seier Kvangardsnes.

Ikkje gjennomførbart på Os

Heime på Os sit dagleg leiar i Os fotball, Endre Brenne, òg som ein av landets arrangørar av Eat Move Sleep cup, men som ein av dei som har valt å avlysa arrangementet.

– For oss er dette det største arrangementet vi har i løpet av året, og sånn som situasjonen er, så har vi valt å ikkje arrangera cupen. Vi såg på dette som ikkje gjennomførbart, rett og slett, seier Brenne.

– Øystese er vel einaste klubben eg veit om som arrangerar denne cupen i år. Eg veit at dei har vore veldig kreative i måten dei skal arrangera på, med å spreia det på tre helger, og med færre påmeldte lag. All ære til Vassnes og gjengen i Øystese som har klart å gjennomføra, avsluttar Brenne.

Utover hausten skal både barn og unge få spelt ulike serieturneringar på aldersbestemte nivå. Alle under 20 år har lov å trena med kontakt, og å spela kampar, og neste veke skal fleire ungdomslag i gang med årets første serierunde.

Men det er visse smittevernreglar som gjeld likevel, og alle spelarar skal før seriestart gjennom eit koronakurs.